PTRS ngatur pengerami Ngiling Bidai kena 29 Jun

0

SELANGAU: Gerempung Tuai Rumah Pelilih Selangau (PTRS) deka ngatur Pengerami Makai Lemai Ngiling Bidai kena 29 Jun ti deka datai.

Nitihka penerang ari pengari komiti pengatur pengerami nya, Tuai Rumah Tungku Balang, pengerami nya deka diatur belabuh ari pukul 6.30 lemai ba Dewan Terbuka SJK (C) Tong Ah, Selangau ditu.

“Pengerami tu berambaika leka jaku ‘Begempung Sepenemu Sa’ati Satu Selangau’ lalu deka dipenyadika Menteri ba Opis Menteri Besai ti mega Kaban Parlimen Selangau Datuk Joseph Entulu Belaun,” pia ku iya madah ngagai pengarang berita ditu, kemari.

Iya madahka sekeda ari tuju gerempung sida ngatur pengerami tu iya nya laban deka ngedutka agi kaul entara bala tuai rumah pelilih nya ngambika ulih begempung dalam semua pekara kelebih agi ba pekara ngemansangka gerempung sida.

Nambahka nya mega, ku Tungku, pengerami tu ila mega bisi digulu Kaban Kunsil Nengeri (ADUN) Tamin Datuk Joseph Mauh Ikeh, Residen Sibu Sim Kok Kee, Pemesai Opis Pelilih Selangau Wan Akil Wan Ahmad Bujang enggau Pemancha Robert Nanta.

Maya pengerami ku iya, mayuh bengkah program ngerindangka ati ke bukai bisi diatur.

Berindik ari nya, barang sapa deka meli tikit mija ke dijual enggau rega RM350 seiti ba pengerami tu tau betanya ngagai Penghulu Michael Jelani nengah lumur 014-208 7288 tauka Penghulu Jerampang Ratoh (019-828 7106), Penghulu Thomas Jawa (013-833 8080) enggau ba Tungku empu (019-805 0057).