KUCHING: Chairman Kunsil Kandang Padawan (MPP) Lo Khere Chiang (gambar) ringatka rembang penemu ari kaban kunsil nengeri (ADUN) Batu Kawa Christina Chiew senentang tuduh sengapa iya nengah media bedau lama tu tadi ti nawa MPP lubah mutarka penanggul parit runtuh di belakang Balai Polis Padawan, Batu 10 ditu.
Nitih penerang Lo, jaku Christina sengapa dipansut lalu nadai bukti ke nyata sereta tau ngusutka runding mensia mayuh.
“Christina madahka pemberita dia MPP lubah bejalaika atur ti patut ti ngujungka mensia mayuh ngaga timbuk pengenan.
“Timbuk nya ukai digaga mensia mayuh tang digaga MPP,” ku iya.
Berindik ari nya, Lo ngelalau Christina mansik dulu tiap pekara sebedau mansutka jaku ngagai mensia mayuh.
“Christina sengapa bejaku sereta beguai mansutka penerang nengah media.
“Penerang ari iya nya tau ngusutka runding rayat,” ku Lo.
MPP udah nemu senentang penusah parit ti runtuh nya lalu benung ba pengawa ngemanahka parit nya, tandu iya.
Lo netapka kus ngemanahka parit nya manggai RM60,000.
“Kereja ngemanah beguna awak menyana bejalaika kereja engineering.
“Tambah agi maya nya benung maya pengerami Gawai lalu kami (MPP) bisi napi penanggul kurang pengereja pengawa,” ku iya.