TEBILANG: Raban Hevance nerima perais ari Snowdan.
SIBU: Lagu ‘Genggam Jariku’ ke disada Gabriel Fairuz Louis mujur dipadu ‘Lagu Pengambis Manah ‘ ba Anugerah Juara Rentak Ruai Ke-6 (AJARR 6) ke diatur ba Dewan Suarah Sibu, malam ensana.
Pemujur iya ke endang peranak asal Rumah Philip Kayak, Sungai Durin, Sibu udah ditengkila bala peminat sekumbang Pro Pemandang AJARR 6 ke diatur berengkah ari Sri Aman, Bintulu enggau ke penudi ba Sibu.
Nambahka nya mega pengelebih enggau peneleba ke dikembuan Gabriel nyadaka lagu ‘Genggam Jariku’ nyentukka ngagai menua tasik kelimpah ngembuan patah nyawa ti liut ngujungka iya dipilih bala hakim champian ba kategori nya.
Gelar tu mandangka iya pulai mai perais mata duit RM5,000 sereta disempulang enggau tropi.
Urung 2,000 iku bala mayuh ke bisi datai maya tu mega chapuh gaga sepengudah raban Hevance ke mai lagu ‘Bajik’ dichiri champian ba kategori Lagu Popular AJARR 6 (nengah undi SMS).
Raban tu champian nengah 7,944 iti undi ninggalka Hailey ke mai lagu ‘Kumang’ ke bulih 5,806 iti undi.
Sekali agi, Gabriel mega mujur dipadu ba penuduk lumur tiga ba kategori nya.
Enggau tu, raban Hevance ke balat ditaga besemekih enggau Hailey berebutka gelar nya pulai mai perais mata duit RM3,000 sereta disempulang enggau tropi.
Hailey ke semina bepuas ati mai perais mata duit RM2,000 enggau tropi lalu Gabriel sekali agi tuchum mai perais mata duit RM1,500 sereta disempulang enggau tropi.
Raban Taju Remaong mega enda pulai lebu mai tropi sepengudah dipadu champian ba kategori ‘Vokal Terbaik’.
Urai ke ditaga bala mayuh ke bisi datai megai gelar ‘Vokal Terbaik’ dipadu bala hakim ti betuaika Nai Dinamik, Zamry Amera, Depha Masterpiece, Isa Lee enggau Brada Beti megai gelar ‘Persembahan Terbaik’ lalu pulai mai trupi.
Kelimpah nyediaka gelar ungkup 12 iku bala finalis AJARR 6, Jenny Tan maya tu mega dipaduka ngempu ‘Anugerah Khas Juri’ lalu ‘Anugerah Penyanyi Bukan Iban’ pulai ngagai Tuah Jili.
Perais bala ke menang disuaka Presiden Gerempung Artis Dayak enggau Pemuzik Dayak (DAMA) ti mega Kaban Kunsil Nengeri (ADUN) Balai Ringin Snowdan Lawan lalu disempulang Penyanding Penemu AJARR 6 Datin Hanifah Taib Alsree enggau Chairman Komiti AJARR 6 ti mega Direkter Besai Cats FM, Mohd Iskandar Mohd Nawawi.
Lagu finalis AJARR 6 tu iya nya ‘Bajik’ ari raban Hevance, Urai ‘Ngarapka Bisi Tedai Pengerindu’, Louis Benet (‘Tua Sama Enggai Beserara’), Donny Lang (‘Enggai Ditimbal Beserara’), Hailey (‘Kumang’), Leena Ranez (‘Bedarah Di Dalam Ati’), Lyssa (‘Cherita Pengerindu Tua’), Gabriel Fairuz Louis (‘Genggam Jariku’), Stevenson (‘Telih Di Ati Di Pangka Janji’), Ranee Pat (‘Aus Pengerindu Ketegal Nuan’), Taju Remaong (‘Enda Sanggup’) enggau Pelima Matthew (‘Nuan Nyadika Penawar’).
Maya tu mega bala mayuh ke bisi datai diperindang enggau lagu ari Tuah Jili, Stanley AF, Melissa Francis, Winnie Albert enggau raban The Crew.
NEMPA UBAH DUNYA MUZIK IBAN: Gabriel (kanan) nerima perais ari Snowdan seraya dikemata Mohd Iskandar enggau Hanifah Taib sepengudah dipadu champian ‘Lagu Terbaik’.
PUAS ATI: Hailey ba penuduk lumur dua ba kategori ‘Lagu Popular’.
BETUAH: Gabriel sekali agi mai perais ba penuduk lumur tiga ba kategori ‘Lagu Popular’.
BEPENGELANDIK: Pengelebih Urai maya ba atas panggau nejuka iya dipadu champian ba ‘Persembahan Terbaik’ malam nya.
UNGKUP RABAN KITA: Snowdan nyuaka perais ngagai Raban Taju Remaong, champian ba ‘Vokal Terbaik’.