Empai bulih 24 jam, Sibu dikenyitka baru enggau penusah angus

0

ENDA NGADANG: Wong maya betemu enggau sekeda ari bala ke ditinggang penusah angus ba Lorong 13, Jalai Tiong Hua ditu, dini hari kemari.

SIBU: Empai bulih 24 jam, sekali agi rayat mengeri Sibu tekenyit bendar enggau penusah angus ke nuntung enam buah rumah suwa di Lorong 13, Jalai Tiong Hua ditu, dini hari kemari.

Ensana mega, urung pukul 11 pagi, seluntang kedai ba Jalai Tukang Besi ditu angus.

Ba penusah ke nyadi ba Jalai Tiong Hua nya, api dipelabaka nyadi entara pukul 12.30 tengah malam ngagai pukul 1 dini hari.

Nitihka dipadah, api bepun ari seiti rumah puang ba genturung nya ke suah alai orang ngereja pengawa enda menuku nyengkaum bepanggang enggau beirupka ai bisa.

Ari tiga buah ruang bilik ke nyuwa dia, rumah seiku pengarang berita ari See Hua Daily News, Wee Hui Cheng bela angus.

Menteri Wang II Dato Sri Wong Soon Koh maya datai ngagai palan penusah madah iya tekenyit bendar enggau penusah angus ke nyadi nya.

Ku iya, penusah ke benung nuntung Sibu diatu ukai semina angus aja tang mega baka kes bebunuh, bebadi ba jalai alun enggau penusah ke bukai.

“Kitai enda ngadang bendar penusah ke baka tu majak nyadi nuntung kitai di Sibu ditu,” ku iya.

Wong ti mega Menteri Kunsil Kandang Menua enggau Pemansang Raban Bansa melabaka api bepun ari seiti rumah puang dia sebedau nyerarai ngagai rumah bukai.

“Aku bisi dipadahka bala ke dituntung penusah nya api bepun ari rumah puang alai seraban orang ngereja pengawa enda menuku.

“Pekara nya udah kala diriput ngagai polis tang nyentuk ke diatu polis empai mutarka penusah nya,” ku iya.

Nya alai ku iya, raban polis, RELA enggau Kawasan Rukun Tetangga (KRT) patut chakah agi bejalaika pengawa nginau ba sebelah genturung pengentap pendiau ngambika penusah baka nya enda nyadi agi.

“Pun penusah angus ditu mega sebaka enggau pun penusah angus ke nyadi ba Kampung Datu/Hilir,” ku iya madahka baru.

Iya ti mega Kaban Kunsil Nengeri (ADUN) Bawang Assan madah Komiti Bantu Penusah Sibu deka mantu bala ke ditinggang penusah tu baka sida ngatur bala ba penusah angus di Kampung Datu/Hilir tu tadi.

“Naka ke diatu kitai benung mansik penusah tu enggau silik. Aku deka ngasuh sida ke bekaul bejalai pengawa mantu bala ditu,” ku iya.

Berebak enggau tu mega, Wong ngelalau bala ditu ngambika bejejimat agi dikena nyeliahka penusah baka nya nyadi lebih agi maya musin kemarau tu.

Kelimpah ari nya mega, Opis Pengintu Pengelantang Mensia Mayuh enggau Opis Pengerai sereta opis ti bekaul ke bukai bisi datai ngelawa palan penusah nya.

Bela bisi datai kia mega iya nya ADUN Pelawan David Wong.

Naka setengah taun tu ke udah, empat bengkah penusah angus bisi nyadi ba mengeri Sibu.

Keterubah, kena 20 Mei, sebuah kilang ba Lorong 20, Jalai Lanang ditu angus ti dipelabaka bepun ari karan.

Nangkan ke nya, kena 19 Jun tu tadi, urung 60 buah rumah ba Kampung Datu/Hilir ambis angus ti ngujungka 585 iku ari 135 ruang bilik nadai agi rumah.

Lalu kena hari Satu tu tadi, seluntang kedai ba Jalai Tukang Besi ditu mega angus.