SEMUA KE MUJUR: Semua 70 iku ke mujur ngulu latih program ‘Fellow Perdana’ begambar begulai enggau Menteri Besai, Datuk Seri Najib Tun Razak sereta menteri kabinet bukai di Parlimen sebedau nyerahka nembiak universiti tu ngagai opis menteri ke endur sida dilatih. — Gambar Bernama
Iya seiku bansa Iban tauka pengari semua Dayak ke mujur dipilih masuk program ‘Fellow Perdana’
KUCHING: Berasai temegah ati laban ngasaika diri semina seiku Iban tauka bansa Dayak ke dipilih masuk program ‘Fellow Perdana’ begulai enggau 70 iku nembiak bukai ukai semina ari menua tu tang menua tasik bukai.
Samuel Sila Mathew Unjah, 25, ari Saratok, seiku nembiak ke benung ngambi Masters (iya bisi Degree ngajar Sejarah) di Universiti Pendidikan Sultan Idris (UPSI), Tanjung Malim, Perak ke nyadi seiku ‘Fellow Perdana’, iya nya sebengkah program nyerumba ‘Fellow Whitehouse’ opis Presiden Amerika Syarikat, ari baruh Opis Menteri Besai Malaysia chukup gaga ati ketegal dipilih entara lebih 600 iku nembiak universiti ke minta masuk program nya.
“Penyampau minta masuk program ‘Fellow Perdana’ 2013 bisi 600 iku, udah nya dikurangka ngagai 100, lalu ke penudi bendar semina 70 iku mujur…Aku berasai temegah ati laban aku seiku aja nembiak Dayak ke dipilih masuk program tu.
“Tambah mega, opis menteri ke alai aku dilatih, endang opis menteri ke dikearap deka ngambi aku, iya nya Opis Menteri Pengawa Bekebun Bedandang Besai enggau Komoditi lalu menteri nya empu, Dato Sri Douglas Uggah Embas deka nyadi ‘mentor’ aku,” ku Samuel.
Nyauka setengah ari 600 peminta diterima ke program tu entara 9 Jun-20 Jun iya nya nembiak unviersiti ke benung belajar lalu 38 persin ari sida tu graduan.
Semua peminta ‘Fellow Perdana’ ari Malaysia, enggau 53 persin benung belajar tauka udah graduate ari universiti menua tu lalu 37 persin bepalan ba universiti menua luar.
Kena hari 15 Julai tu tadi, Menteri Besai Datuk Seri Mohd Najib Tun Razak bejadika program ‘Fellow Perdana’ ke nyambut 70 iku nembiak universiti ke deka dilatih nengah program nya di Putrajaya, ngagai pengabis lama tiga bulan ungkup sekeda graduate lalu sekeda naka 6 minggu ungkup nembiak universiti ke benung belajar.
Ari menua Sarawak empu, antara 70 nembiak ke dilatih nengah ‘Fellow Perdana’, bisi 7 iku (Samuel seiku aja nembiak Dayak lalu ke bukai nya bansa Melayu enggau Cina).
Lebuh dikerandau nengah telefon kemari, bakani ku asai ati iya, seiku nembiak Dayak ke mujur bulih ‘Fellow Perdana’, ku Samuel:
“Aku gaga ati kena pilih masuk program ‘Fellow Perdana’ tu laban ngasaika diri betuah besemekih enggau raban graduate bukai, ukai semina ari menua tu empu tang universiti menua tasik.
“Kelimpah ari nya mega, aku ngasaika peneleba ‘hands-on experience’ ari menteri empu, nyadi ‘duta’ ke perintah, bepeluang mantaika polisi perintah enggau penemu ke di ulih kami ngagai redak baru diatu,” ku iya.
Maya dikerandau, Samuel enggau semua raban ‘Fellow Perdana’ bukai benung bejalaika program peneleba enggau Opis Menteri ke ngatur program tu, iya nya Opis Menteri Nembiak, Lumba enggau Main ari baruh menteri Khairy Jamaluddin, sebedau sida iya dianjung ngagai opis menteri bukai ke endur sida iya dilatih.
“Enda sabar nganti dianjung ngagai Opis Menteri Pengawa Bekebun Bedandang Besai enggau Komoditi. Aku deka belajar enggau chukup segala utai ke patut ditemu aku, lalu mai peneleba tu ngagai nembiak bukai,” ku Samuel.
Program ‘Fellow Perdana’ komited deka meri pengawa latih ke pengabis manah ngagai pelatih program tu, ke deka bulih peneleba sida terus ari menteri ke nyadi ‘mentor’ sida iya, nyengkaum di Opis Menteri Besai enggau Opis Sapit Menteri Besai empu.
Bida entara graduate ‘Fellows Perdana’ enggau program ungkup ke benung belajar iya nya graduan ‘Fellow Perdana’ diatur ungkup bala graduate ke baru abis belajar di universiti, lalu sida ke benung belajar, bisi ungkup diri.
Program graduate ‘Fellow Perdana’ patut bisi komitmen pengabis pandak 3 bulan ba program tu, lalu pengabis lama manggai 6 bulan.
Lalu ungkup graduate ke benung belajar (Fellow Perdana Undergraduate), timpuh pengabis pandak, 6 minggu lalu ke pengabis panjai manggai 3 bulan.
Tiap iku nembiak graduate ‘Fellow Perdana’ nerima elawin tetap ari Perintah Besai.
Enti sida deka terus gawa ba opis menteri ke endur sida iya dilatih, sida iya tau minta perambu nya ari opis menteri ke endur sida dilatih, lalu enti bisi atur bukai, bepanggai ba program ‘Fellow Perdana’.
Kelimpah ari nya mega, tiap iku ‘Fellow Perdana’ deka nerima setipikit ari ‘mentor’ sida nyengkaum pemutus pengelandik sida gawa ba pengujung program tu ila.
Program ke ditengkebang Menteri Besai Datuk Seri Najib Tun Razak agi ngiga nembiak Malaysia ari baruh umur 30 taun, sereta ngembuan penyulut akademik sererta aktif dalam ko-kurikulum, ke deka disengkaum dalam program ‘Fellow Perdana’ nangkanka rintai tu dudi ila.