MARUDI: Menteri Muda Perengkaguna Mensia Mayuh (Bekal Ai) ke mega Menteri Muda Betanam Betupi (Gerempung Orang Bumai Bekebun) Datuk Sylvester Entri Muran madah Pemesai Pelilih Menua (DO) Marudi, Joseph Belayong ke suba seiku pemesai ke bagas gawa sereta seruran bejalaika pengawa enggau manah sepemanjai gawa ba Baram lebih tujuh taun.
Entri madah taja pan Baram sebuah pelilih menua pesisir ke pengabis besai ba menua Malaysia tang Belayong sanggup turun padang, nemuai ke rumah-rumah panjai, genturung pendiau bansa Penan enda ngira nya ngena jalai ai ke jauh tauka bejalai kaki ngena jalai darat ke begunaka timpuh antara enam nyentuk ke sebelas jam pejalai nyentuk ke Ulu Baram baka Long Banga.
“Taja pengawa ke disan iya berat sereta pejalai ke jauh, tang iya enda kala besebana madahka diri lelak laban ba ati iya sigi deka meda kediri atur pemansang ke dipejalai ba ulu entigis,” ku Entri.
Entri ke mega ADUN Marudi madah ba pengerami makai selamat beserara ngagai Belayong ke deka ditikika pangkat sereta pindah gawa ba Opis Menteri Pemansang Tanah, ujung bulan tu. Iya deka diganti Mackos Sibong.
Tandu Entri, Belayong ngembuan peneleba ke mayuh sereta kala nyadi chairman komiti kereja pusat Pesta Regata Baram iya nya dua kali ba taun 2008 enggau 2011.
“Kitai enda kala meda iya duduk begulai enggau VIP tang iya suah agi bejalai kin kitu matau kaban komiti enggau pengereja pengawa ke udah dipadu ngambika pengerami nya bejalai enggau mujur sereta teratur,” ku terang Entri baru.
Ku iya, Belayong mega ngembuan penemu ke tegap maya bejalaika pengawa sereta ngereja pengawa nya enggau ati ti bendar.
Entri mega andal peneleba ke dikembuan Belayong betapi enggau ampuh besai ke suah nuntung Baram lalu enggau jampat iya numbuhka Komiti Penyah Penusah kena napi penusah nya.
“Tang sehari tu kitai enda ulih ngetanka iya agi di Marudi laban udah ditikika pangkat lalu ngesan tanggungpengawa ke berat agi,” ku Entri sambil madah Belayong ke mega seiku lelaki ke kemerah, endang dipebasa sereta dikerindu raban pengereja pengawa iya enggau tuai-tuai raban bansa di Baram.
Sama bisi ba pengerami nya Kaban Parlimen Baram, Anyi Ngau; Sekretari Politik Kepala Menteri, Richard Wil Uban; Residen Miri, Anthonio Khati Gallis sereta DO Baram ke baru, Mackos Sibong enggau bala tuai raban bansa ditu.