SRI AMAN: Menteri Muda Pemansang Menua Pesisir, Datuk Francis Harden Hollis madah, bungkur ai paip beresi deka dikerembaika ngagai kandang menua pesisir di Sri Aman dudi ila.
Ku iya, tiga bengkah langgur pelin enggau pekara nya udah dianjung ngagai Opis Menteri Pemansang Infrastruktur ngambika dikemendarka ila.
Ku iya, langgur pelin keterubah iya ngemesaika bungkur ai paip beresi ngagai sepemanjai dua kilometer ari San Ugol nyentuk ke San Munggor, Sri Aman.
Langgur pelin kedua iya nambah pemesai bungkur ai paip beresi ngagai sepemanjai enam kilometer belabuh ari Klassen nyentuk ke Lepong Simpai, ku iya.
“Langgur pelin ketiga iya nya ngerembaika bungkur ai paip beresi ngagai sepemanjai 10 kilometer berengkah ari Juntong ke SK Batu Lintang, Kelinik enggau Ijok,” ku iya.
Iya madah munyi tu ngagai pengarang berita sepenembu bejadika Pengerami Nyuaka Chek Projek Mit Pemansang Menua Pesisir (MRP) ba opis SUPP pampang Simanggang, ditu ensanus.
Harden udah Nyuaka Chek Projek Mit Pemansang Menua Pesisir (MRP) RM110,000 ngagai 11 raban penerima ari kandang menua Sri Aman enggau Lingga.
Berebak enggau nya, Harden arap endar ati pekara nya ila ulih mutarka penanggul penguna ba kandang menua nya ke bepanggai ba chara bukai ngulihka ai enti sema langgur penemu nya dikemendarka ila.
Sama bisi maya nya, Sapit Residen (Pengawa Rama) Sri Aman, Felicia Tan, Temenggung Sii Toh Peng, Pengulu Haji Abdul Samad, Konsilor Andar, Ketuai Indu SUPP Simanggang, Lim Siew Hung enggau Sapit Nembiak SUPP Simanggang, Patrick Michael Malajin.