Opis, ijinsi perintah aruh neladan SEDC: Morshidi

0

KUCHING: Ijinsi enggau opis perintah patut neladan chara kompeni besai baka Gerempung Pemansang Ekonomi Sarawak (SEDC) ngereja pengawa ti ngemeratka integriti sereta teulihka pemujur.

Sekretari Perintah Menua, Tan Sri Datuk Amar Morshidi Ghani ke nyadi seiku ketuai ti ngemeratka servis pengereja pengawa perintah di menua tu, ngansak ijinsi sereta opis perintah neladan sistem enggau atur pengawa ke dipandangka SEDC.

“Chara SEDC ngatur pengawa tau ngasuh kitai temegah ati. Inisiatif sida iya udah ngeluarka dividen, bukti nya tau dipeda kitai dalam pemujur sida iya,” ku iya bejaku nyerumba atur pengawa bejadika program ‘SEDC Integrity and Governance Gallery’ ba opis SEDC ditu, kemari.

Siti ari inisitiaf ke ngujungka ‘Malaysian Code on Corporate Governance’ (MCCG) ke ditumbuh bulan Mach 2000, dikena negutka gerempung besai ke ari baruh kuasa perintah.

MCCG nyengkaum lapan iti prinsipal, iya nya ‘Establish clear roles and responsibilities between Board and Management, Strengthen Composition of the Board, Reinforce independence of the Board, Foster Board Commitment, Uphold Integrity in Financial Reporting, Recognise and Manage Risks, Emsure Time and High Quality Disclosure enggau Strengthen relationship between company and shareholders’ .

Kod tu ku Morshidi, udah dua kali di ubah dalam taun 2007 enggau 2012, alai MCCG 2012 berati negutka (board structure and composition).

“Pengelikun enggau undang-undang kompeni mega dipansik baru lalu diubah,” ku iya.

Iya nambah, SEDC terus nyadi sebuah ijinsi perintah ke agi ngetanka peguntung ke diulih sida iya dalam operasyen.

“Kedua, aku beratika opis tu udah jauh berubah, ke manah agi tusun sereta sistematik. Kita bisi sistem ngereja pengawa ke udah ditusun enggau manah kelimpah ari tusun atur aum tauka ‘takwom’.

“Lalu ketiga, aku beratika gaya sereta gamal ijinsi tu mega udah digaga manah baru. Kita ukai semina bulih USD350 miliun Bond Sukuk Al-Ijarah ti dikeluar dalam taun 2004, tang kita mega mujur teulihka pansik kredit ke manah, ke ditikika ngagai tiga renggat, ari atas gred Baa3 ngagai Baa1,” ku iya.

Morshidi ti nyadi kaban Kunsil SEDC ari bulan Jun 2005 sereta mengkang nyadi Chairman Komiti Kunsil Audit SEDC, madah SEDC mega mujur ngaga projek dalam timpuh enggau bajet nitihka spesifikasyen ke teulihka rega ke numbas pemesai.

“Ambika chunto, baka (NKRA) Palan SeDidik digaga enggau kos ke jauh murah ari gerempung bukai,” ku iya.

Iya nandu baru, SEDC mega kala menang pekit ‘Malaysia Business Ethics Excellence Award’ dalam taun 2008, teulihka 4-Bintang mark dalam Indeks Akauntabiliti Opis Audit Menua, empat taun beturut ari 2009.

“Ke ditemu aku diatu SEDC mega teulihka mark ke pengabis tinggi antara semua ijinsi menua,” ku iya.

“Opis Kunsil patut beratika chara ngatur pengawa opis ke pengabis manah enti sida iya deka nyadi efektif, lebih agi ngagai gerempung ke ukai ngiga penguntung, nyengkaum peribit enggau kompeni perintah sereta gerempung,” ku iya.

Sama bisi ngulu atur pengawa nya, Menijer Besai SEDC Soedirman Aini, Chairman Kunsil Orang Dagang Bumiputera (DUBS) Datuk Abg Abd Karim Tun Openg sereta Kepala Polis Datuk Acryl Sani Abdullah Sani.