Pintu semampai telengga: Masing

0

KUCHING: Parti Rakyat Sarawak (PRS) nelenggaka pintu sida ngagai lima iku ex- ketuai Parti Demokratik Prgoresif Sarawak (SPDP) ke ngelar diri G5.

Presiden PRS Tan Sri Dr James Jemut Masing (gambar) madah lima iku ketuai nya diatu enda ngira maya ulih masuk nyadi kaban parti (PRS) enti sida ngembuan pengingin ke bansa nya.

Lima iku ketuai (G5) ke udah ditingkilka SPDP iya nya Datuk Peter Nansian (Tasik Biru), ex-Kaban Parlimen Mas Gading Datuk Dr Tiki Lafe, Datuk Sylvester Entri Muran (Marudi), Paulus Palu Ngumbang (Batu Danau) enggau Rosey Yunus (Bekenu).

Maya dikerandau kemari, Masing madah PRS nadai netapka atur tauka syarat enti sida deka masuk parti.

“Enti sida (G5) deka masuk nyadi kaban PRS..nadai atur tauka syarat ditetapka ngagai sida. Sida ulih masuk sebarang maya,ku Masing madah nengah mesej iya kemari.

Masing bejaku munyi nya nimbal penerang ari Nansian kemari (ensana), ke nyadi ketuai raban nya madah sida deka masuk nyadi kaban kompenen parti Barisan  Nasional (BN) ke bukai kena nampung pejalai politik sida sereta kena ngemansangka rayat ke udah nyukung sida ngelama tu.

Masing mega madah, parti deka mantu semua sida (G5) ngenataika atur pemansang ngagai rayat (pengundi) ke udah ngundi sida.

Menteri Pemansang Tanah nya lebuh ditanya enggai madahka iya bisi betemu enggau raban nya kelimpah ti enggai ngamatka senentang berita selebubu bekaul enggau sida lima nya ke dipelabaka masuk PRS.

Ari lima iku, empat mengkang nyadi pengari rayat pengudah Dr Tiki alah ngelaban chalun SPDP ba Mas Gading Anthony Nogeh rambau pengawa bepilih besai ke diatur kena 5 Mei tu tadi.

Sida udah ditingkil ari SPDP – Entri ditingkil dalam bulan Nov 2011, lalu ditangkanka empat ke bukai ba bulan Jan 2012.

Sekumbang ke nadai parti, Nansian, Rosey enggau Entri mengkang mangku pengawa nyadi Menteri Muda, Paulus agi nyadi chairman Palan Penyangkai Kapal Miri enggau Dr Tiki nyadi chairman Program Latih Ke Bansa (PLKN) nyentuk ke diatu.