KUCHING: Program “PDK Ku Sihat”, sebengkah program pengerai ti nyerangkung komponen bansa pemakai ti bepengerai enggau aktiviti selangkuh tubuh ungkup Orang Nyelai Pendiau (OKU) di nengeri tu udah dipenyadika kemari.
Sapit Presiden Sarawak Badan Amal Tenaga Isteri-Isteri (SABATI), Dato Sri Puan Sri Empiang Jabu madah, ngambika pelatih Palan Pemulai Pemanah Pendiau dalam Komuniti (PDK) ulih ngemeranka gaya idup bepengerai enggau aktiviti selangkuh tubuh ti tetap.
“Tuju kitai ngatur program ‘PDK Ku Sihat’ dikena ngenegapka tikas pengerai pelatih PDK, ti ngemeranka pengidup bepengerai enggau bejalaika aktiviti selangkuh tubuh ke tetap dikena nyeliah sereta ngurangka ari macham penyakit kronik baka penyakit jantung, diabetes enggau hipertensi.
“Enggau tuju nya, Buku Panduan dan Manual udah dikeluarka Opis Menteri Pengerai ngambika disadung ngagai semua PDK awakka ulih diperati sereta dikemeranka (PDK).
“Program nya nyerangkung meresa tikas pengerai tiap iku pelatih, meri penerang chara makai ti bepengerai; nyendiaka Panduan Fizikal / senaman; nyendiaka pelin pejalai aktiviti enggau nyendia langkar pematau enggau atur meresa program, “ ku iya.
Empiang mansutka pekara nya lebuh bejaku ba pengerami bejadika Program ‘PDK Ku Sihat’ enggau pemeri Hari Raya Aidilfitri 2013, ti diatur SABATI ba Dewan Sebaguna, Yayasan Sarawak ditu, kemari.
Program nya dipenyadika Presiden, Sarawak Badan Amal Tenaga Isteri-Isteri (SABATI), Puan Sri Raghad Kurdi Taib Mahmud.
Nyerumba pengerami bejadika “PDK Ku Sihat” kemari, nengah Program Semai BAKTI perintah ngungkupka sepenyampau RM66,000 ngagai 33 PDK ti direjister tumu, awakka bisi dikena bejalaika Program “PDK KU Sihat” enggau aktiviti bukai.
SABATI ku Empiang diberi tanggungpengawa ngagihka belanja nya ngagai semua PDK ke patut di nengeri tu.
“Bisi 33 PDK ti udah direjister tumu deka nerima ungkup belanja ari Progran Semai BAKTI sepenyampau RM1,000 tiap PDK. Nya dikena bejalaika Program ‘PDK Ku Sihat’”.
“Kelimpah ari nya, ungkup belanja sepenyampau RM1,000 mega diungkupka dikena bejalaika aktiviti bukai di PDK,” ku iya.
Nyerumba pengerami bejadika program nya, SABATI ngambi peluang meri pemeri Hari Raya Aidilfitri iya nya duit raya enda ‘raya goodies’ ngagai semua pelatih ba empat PDK di kandang Kuching ti mungkur 217 iku pelatih.
Palan PDK nya nyengkaum PDk Gita, Matang; PDK Wawasan Harapan, Kampung Buntal; PDK Petra Jaya, Semariang Batu enggau PDK Sinar 1 Malaysia (Bandar Baru Samariang).
Bela datai ngulu pengerami nya, Menteri Pengintu Pengelantang, Orang Indu enggau Pemansang Ruang Bilik Datuk Fatimah Abdullah; Coordinator Program Semai BAKTI Sarawak Datin Feona Wan Junaidi, Chairperson Pengatur, Komiti Pengintu Pengelantang SABATI Dato Puan Sri Jamilah Anu enggau pengari ari Opis Pengerai, pengari Opis Pengintu Pengelantang Raban Bansa, pengari Yayasan Sarawak enggau pengari ijinsi kebukai.