KUCHING: Dayak Bidayuh National Association (DBNA) angkun deka nentuka tetiap tanah adat bansa asal (NCR) Bidayuh di pelilih Kuching enggau Kota Samarahan diberi surat pala tanah.
Ba pengawa randau ‘Land Documentation’ ti diatur di indu Opis DBNA Jalai Ong Tiang Swee ditu kemari, Presiden DBNA Datu Ik Pahon Joyik madah pengawa nya sejalai enggau program perintah ti nyukat kelingi tanah NCR di serata nengeri.
“DBNA nyaup meri penerang ngagai raban bansa Bidayuh tuju ke endar program nyukat kelingi tanah NCR dipejalai perintah ti diarika Opis Tanah enggau Servei (JTS).
“Orang beempu tanah patut mutuska entara tanah diri sebedau raban JTS datai nyukat ngambika pengawa tu ulih dikereja enggau muntang,” ku iya.
Dulu agi ari tu, iya ngemata Menteri Muda Pengerai Mensia Mayuh Dr Jerip Susil bejadi Forum Nembiak ke diatur di Bangunan DBNA.
Tandu iya, Biro Tanah DBNA udah ditumbuh ba taun 2008 dikena mantu orang beempu tanah netapka entara tanah diri lalu disetuju orang ke beempu ti berimbai tanah.
Ku iya, pengudah disetuju orang ke beempu tanah, penerang nya deka diadu enggau manah lalu diserahka ngagai JTS.
Naka ke diatu, Kampung Skuduk di Padawan enggau Kampung Pisa di Bau udah nerima surat pala tanah asil ari program nyukat kelingi ti dibantu DBNA.
Lebih 100 ruang bilik di Kampung Skuduk nerima pala tanah ba bulan Disember 2012 lalu di Kampung Pisa ke bela lebih 100 ruang bilik nerima ba pun taun 2013 tu.
Pahon netapka semua 339 buah kampung raban bansa Bidayuh diserangkum dalam proram ‘Land Documentation’ ti dipejalai Biro Tanah DBNA ke alai ari penyampau nya, 60 buah kampung udah tembu digaga.
“Kitai nerima pemendar ari ketuai perintah Sarawak bejalaika program ‘Land Documentation’ ti tebal agi diadu enggau tuju ngemuntangka atur sukat kelingi ti dipejalai JTS.
“Kerejasama orang beempu tanah sereta sukung ari tuai raban bansa semampai ditagih dalam kitai ngemujurka program tu,” ku iya lebuh bejaku ngagai pengari 25 buah kampung ari pelilih mit Lundu, Bau enggau Padawan ti ngulu randau nya.
Bela datai Temenggung Austin Dimin sereta Chairman Biro Tanah DBNA William Nyigor.