Tuesday, August 16

Serikin enda tau dikelaung maya nyikap pengerami

0

PALAN BEBELI BARANG TEBILANG: Pasar mit Serikin mayuh nyual macham barang ke popular ba orang menua tu enggau ari semenanjung.

Pasar mit ke enda jauh ari entara garis menua Kalimantan enggau S’wak dedat belama maya ujung minggu

BAU: Pasar mit Serikin, sebuah pasar enda jauh ari garis entara menua ke nyeraraka Pelilih Mit Bau enggau Kalimantan Barat,  ulih gusung urung 45 minit ngena entukar ari Kuching, tebilang ba orang menua tu enggau semenanjung nyadi palan endur sida bebelika macham barang.

Ujung minggu tu tadi, minggu ke penudi sebedau raban Muslim di menua tu nyambut pengerami Hari Raya Aidil Fitri, lalu maya nya mega mensia mayuh bededat bebgelika barang penyikap dikena nyambut Hari Raya Aidilfitri.

Pasar Serikin ke semina dibuka ujung minggu aja, hari Enam enggau hari Minggu belabuh dibuka ngagai mensia mayuh ari pukul 8.00 pagi.

Nya pan, udah mayuh mensia ke nganti pasar nya dibuka, beguai enggaika kelalu angat enti nyau nurun tengahari nyengkaum berebut enggau orang mayuh bebelika barang.

Pasar Serikin mega dikelala nyadi palan bebelika barang di menua besai baka Kuala Lumpur (di Jalai Tunku Abdul Rahman), mayuh bejualka barang ari perengka dapur nyentuk ke baju fesyen baka ke dikerindu orang indu, iya nya ‘Kaftan’.

Sharifah Nurilyani Syed Mokhtar, 31, seiku indai orang ari Penang ke jadi enggau laki iya ari Kuching, udah empat kali ke Serikin meli barang ke anak iya ke berumur dua taun, Syed Ali Uraidi Syed Abdul Rahman enggau meli ‘Kaftan’ ke iya empu.

“Rega baju baka ‘Kaftan’ jauh murah, urung 50 persin ari ke dijual di Kuala Lumpur enggau Kuching, tambah mega kitai bisi mayuh pilih. Tiap taun enti aku pulai ‘beraya’ di rumah  entua aku di Kuching, aku tetap kitu, siti ari program kami menyanak, enda tau enda bebelika barang ditu,” ku Sharifah Nurilyani ke deka nyambut Hari Raya sampai ngagai hari ketiga sebedau sida menyanak pulai ngagai rumah apai indai iya di Penang.

Siti Hanisah Hud, 22, Pembantu Makmal di sebuah sekula di Kuching rindu meli barang lebuh hari besai Hari Raya Aidilfitri nyauka semak laban ku iya, rindu meda orang mayuh berebut bebelika barang.

“Serikin sebuah palan ke enda tau enda digusung lebuh deka bebelika barang. Baka baju tradisional ‘ala-ala Arab’ Kaftan, tudung pala, enggau barang ias bukai. Semua udah dibeli aku ditu magang, semina nganti Hari Raya aja.

“Rega barang-barang di Serikin jauh murah taja pan ba India Street Kuching bisi bejualka barang nya tang rega ditu jauh murah,” ku iya ke asal ari Sri Aman gagit deka nyambut hari besai Muslim nya.

Ba sida ke bejual barang ba pasar Serikin nya, ke mayuh datai ari menua Indonesia, lebuh dikerandau madahka dagang sida iya umbas pemanah, kelebih agi lebuh maya hari besai.

“Bejual gari baka baju, perengka guna dapur, barang ias rumah sereta utai pakai baka kuih enggau biskut ari Indonesia, rindu meda orang beguai bebelika barang, tang pelaba aku taun nyin tadi rami agi,” ku Samsuddin Masduki ke bejual kain batik.

Baka ‘Kaftan’ ke dikerindu orang indu kena Hari Raya ke endang ‘popular’ ari taun siti nyin tadi, seiku orang ke bejual ‘Kaftan’ madah ‘Kaftan’ ke digaga penuh enggau marik, batu Kristal enggau sulam bukai dijula nitihka rega.

“Kaftan ke digaga bemarik, sereta sulam (ke dikumbai sida iya ‘Fayet’) bisi mar mimit entara RM70 ngagai RM95 laban kualiti kain manah agi baka ngena ‘Chiffon’ tang iya jauh murah enti dibanding enggau rega ke dijual di menua tu,” ku Mohamad Deah, ke mai ‘Kaftan’ ti digaga di Bandung, Indonesia, nyerumba menua besai ke tebilang enggau bemacham fesyen.

Entara pemakai ke laku dijual, iya nya baka bemacham kerupu, ke dikumbai sida iya ‘kerepek’, ari ‘Kerepek Malinjo’, ‘Kerepek Pisang’, ‘Kerepek Kentang’ enggau ‘Kerepek Ubi’, bansa kerupu ke popular sereta murah dibeli, dijual enggau rega RM5 sebungkus 500grams.

Taja pia, semua sida ke bedagang ari Indonesia nya madahka, untung sida pama pemanah.

KERUPU: Macham bansa kerupu ari Kalimantan ke bisi dijual di Pasar Mit Serikin.

KAFTAN KE POPULAR: Jait baju bemarik chukup manah sereta jauh murah ari ke dijual di kedai menua tu.