Bisi 525,000 hektar tanah NCR di S’wak udah disukat

1

SARATOK: Menteri Pen­gawa Bekebun Bedandang Besai enggau Komoditi Datuk Seri Douglas Uggah Embas madah, nyentuk ke diatu bisi 525,000 hektar tanah Adat Bansa Asal (NCR) di Sarawak udah disukat.

Ku iya, ari penyampau nya, 181,000 hektar udah digazet.

“Ungkup taun baru, Menteri Besai Datuk Seri Najib Tun Razak udah meri geran RM30 miliun dikena belanja nyukat ngelingi,” ku iya madah ngagai Bernama kena Hari Enam tu tadi.

Uggah bejaku munyi tu sepenembu bejadika aum pengari Pesaka Bumiputera Bersatu (PBB) sitak Kerian di dewan mensia mayuh ditu.

Ku iya, nengah pengawa nyukat kelingi tanah nya, sida nemu ni bagi tanah NCR tauka tanah perintah nengeri.

“Bisi pilih bukai baka bejalaika pansik lot genap iku, tang begunaka timpuh sereta ungkus ke besai laban bisi beberapa miliun lot tanah nya,” ku iya.

Uggah ke mega mandal presiden PBB madah, se­bengkah aum udah diatur enggau Opis Tanah enggau Survei dikena nemu eng­gau chara kasar penyampau tanah NCR laban bisi sekeda nya udah dikemansangka ari baruh Sekim Ekonomi Baru Pemansang Tanah NCR baka di Betong, Kanowit enggau sekeda endur bukai.

“Enti kami udah nemu pemesai tanah, kami ulih netapka maya bejalaika pansik laban perintah deka ngemansangka tanah nya enggau naka pengelengkas nitihka strategi dikena mu­naska penyeranta ba menua pesisir,” ku iya.

Berebak enggau nya, Uggah madah, perintah ngembuan juluk deka ngemansangka 30,000 hektar tanah endur nanam sawit di Sarawak dalam taun tu.

Ku iya nandu, program bantu ari perintah dikena nanam sawit nya deka bereng­kah dipejalaika dalam bulan dudi tu ila. — Bernama