Dennis: Penemu ngenggaika atur nyukat kelingi tanah NCR sida bepun ari runding semua

0

MIRI: Dennis Along ti mantaika sebana senentang pengawa nyukat kelingi tanah Adat Bansa Asal (NCR) di Genturung Pendiau Long Terawan dalam Facebook apin lama ke udah, enggai ngaku nya penemu iya kediri.

Ku iya, pemutus mantaika sebana nya digaga pengudah berandau enggau seraban peranak ari genturung pendiau Long Terawan, nyengkaum sekeda ketuai raban bansa ari kandang menua nya.

“Tembu baum, kami sebuat setuju mantaika penerang nya, ukai diputuska aku kediri.

“Taja pia, aku berasai asa bendar ati lebuh seiku ari ketuai nya ke sama bela setujuka pemutus nya lalu bebali penemu ngalaban kami,” ku iya.

Ku iya, iya mantaika penerang sentang pengawa nyukat kelingi tanah NCR ba genturung pendiau Long Terawan laban iya enggau seraban peranak menua nya sama bela sepenemu, nya alai sida enda patut nuduh iya nempa pekara nya.

Ba penerang ke dipansutka iya dalam Facebook, Dennis madahka pengawa nyukat kelingi tanah Adat Bansa Asal (NCR) nya enda manah ba orang ke ngempu tanah laban sida enda ulih minta pampas enti sema tanah sida nya diambi perintah tauka kompeni.

Dennis ke mega Ketuai Penerang Parti Keadilan Rakyat (PKR) Baram madah, pekara tanah Adat Bansa Asal (NCR) nya ukai semina dikemeratka iya seiku aja, tang mega sekeda peranak genturung pendiau Long Terawan sereta sekeda ketuai raban bansa.

Ketegal penerang ke dipansutka Dennis ba Facebook, seraban peranak genturung pendiau Long Terawan ti betuaika Tuai Rumah Edmund Abang enggau Konsilor Gary Hashim, udah ngaga aum enggau pengarang berita.

Dalam aum enggau pengarang berita nya, Edmund seduai Gary madahka penerang ti dipansutka Dennis nya ngemba orang ti ngempu tanah NCR ngambika anang begempung enggau raban ari Opis Tanah enggau Survei bejalaika pengawa nyukat kelingi ba menua sida.