Isu mit dikemesaika sida maya PRN ila, ku Mong

0

LEMPAI BA PENGARI BN AJA: (Ari kanan) Mong, Nyalau enggau Dr Rayong besaup nglepaska anak ikan ba sungai maya atur pengawa nya.

Penyakal semina landik mejah tang enda mantu, manah agi semua penanggul dilempai ba pengari rayat ari BN

ENGKILILI: Menteri Muda Betanam Betupi Datuk Mong Dagang ngelalau peranak menua pesisir ngambika enda ngelempai sebarang penanggul ke ditapi sida ngagai raban penyakal.

“Sebarang penanggul ke ditapi kita aruh dilempai ba pengari rayat ari Barisan Nasional (BN), Opis Residen, Opis Pelilih Mit tauka ijinsi perintah bukai ke bekaul,”

Seraya madah, penyakal enda tebantuka rayat tang landik mejah, iya meransang semua peranak menua betanya tauka ngelempai penanggul ke ditapi sida ba pengari rayat BN aja.

“Nadai salah entai semua penanggul ke ditapi kita ditusoi tauka dipadah ngagai pengari rayat BN ba sitak diri. Nama guna madah ngagai penyakal enti semina nemu mending aja tang enda ulih mutar,” tandu iya.

Mong ke mega Kaban Kunsil Nengeri (ADUN) sitak Bukit Begunan bejaku munyi nya maya bejadika Program Beripai Meresi Alir Sungai sereta Kimpin Pengelikun enggau Pemereti Rampa Menua di Rh Anggang, Ng, Mejong, Skrang, ditu kemari.

Nyerumba atur pengawa nya Mong ngungkupka RM7,000 Projek Mit Pemansang Menua Pesisir (MRP) ngagai Komiti Pemansang enggau Pengelikun Genturung Pendiau (JKKK) Rh Anggang.

Kelimpah ari nya iya ngelalau, enti penanggul dilempai ngagai penyakal dia sida ngena isu nya lebuh maya bekimpin ba Pengawa Bepilih Nengeri (PRN) tu ila.

“Isu ke mit nya deka nyadi besai dikena sida ngulihka sukung ari rayat maya PRN ila.

Bela bisi ngulu atur pengawa nya Kaban Parlimen Lubok Antu William Nyalau anak Badak, ADUN Engkilili Dr Johnnical Rayong anak Ngipa, Ketuai Penerangan Parlimen JASA P.203 Lubok Antu Geoffery Baja anak Ricky Maba, pemesai opis perintah ke bukai sereta sekeda tuai rumah ngelingi Engkilili.