Padah enggau terang kuing politik

0

KUCHING: Parti-parti politik ke baru ditumbuhka dilalau enda nyaru runding mensia mayuh bekaul enggau kuing politik sida.

Ku Sekretari Besai Barisan Nasional (BN) Sarawak ke mega Kaban Kunsil Nengeri (ADUN) Kemena, Datuk Dr Stephen Rundi Utom madah, enda ngira kuing politik sida bebakih enggau BN tauka enda, sida patut nerangka enggau nyemetak tuju sereta kuing parti diri empu.

“Kitai ukai deka berandauka sida begulai tauka udah ninggalka BN sebedau tu tang PBDS Baru sebengkah parti politik baru ke direjister Opis Pengerejister Gerempung (ROS) bedau lama tu tadi.”

“Berindik ari nya, sida patut nerang enggau terang sereta nyemetak kuing politik sida enda ngira nya sida bebakih enggau BN tauka enda laban sida sebengkah parti politik ke baru direjister,” ku Rundi lebuh ditelefon ensana.

Iya bejaku munyi nya maya dipinta nimbal penerang ke dipansut chairman protem Parti Bansa Dayak Sarawak Baru (PBDS Baru), Louis Jarau, ke madahka parti PBDS lama sereta kaban parti nya enda kala nyeraraka diri ari BN baka ke udah didinga sebedau tu.

Berebak enggau nya mega, Kaban Komiti Besai BN nengeri ke mega ADUN Asajaya, Abdul Karim Rahman Hamzah madah, ari sukut undang-undang PBDS Baru sebengkah parti baru taja pan bisi leka jaku PBDS ba mua tang nya ukai parti ke lama baka ke udah dikerandau maya diatu.

“Parti PBDS ke lama udah nadai ayan agi pengudah pengerejister parti nya dikinsil ROS sebedau tu.

“Nya alai, enda ibuh barang sapa kita nyaru runding ke madahka parti PBDS Baru sebengkah parti komponen BN,” ku Abdul Karim.

Tandu iya, enti sema PBDS Baru bisi ati deka begempung nyadi sebengkah parti komponen BN, sida tau ngaga peminta bekaul enggau pekara nya.

“Enti sida beamat-amat deka begempung enggau BN, sida patut minta nyadi parti komponen BN tauka enda ibuh numbuhka parti baru ketegal ke deka madahka diri bebakih enggau BN,” ku Abdul Karim.

Kelimpah ari PBDS Baru, empat parti politik ke bukai ke udah dikemendar direjister ROS bedau lama tu tadi iya nya Parti Tenaga Rakyat Sarawak (TERAS), Parti Bumi Kenyalang (PBK), Parti Ekonomi Rakyat Sarawak Bersatu (PERSB) enggau Parti Gabungan Jaksa Pendamai (Peace Party-Sarawak).