DIBEREKAT: Bolly (kanan) merekat Chapel sereta rumah ke udah ditangkir. — Gambar Churchill Edward
MANSANG MEREKAT: Bolly (dua kiba, baris mua) nguluka bala pemesai gerija enggau redak genturung pendiau meresa bidang tanah ke alai ngagai Pendam Keristin. — Foto Churchill Edward
LALU MEH: Bolly (dua kanan) ngerandau raban gerija seraya Gimang, entunda udi iya ari belakang. — Gambar Churchill Edward
UDAH DIPENYADI: Bolly (kanan ) muka tire kelai bejadika Chapel sereta rumah ke udah ditangkir. Bisi ayan mega Ugas (kiba) enggau Gimang. — Gambar Churchill Edward
LANDIK: Dua iku nembiak (tengah) ngayanka pengelandik diri ba sebengkah panggau pemerindang beserimbai enggau pengawa bejadika Rumah baru St Michael enggau Chapel All Angels sereta rumah tangkir enggau mega lumpung sekula ke baru.
KOTA SAMARAHAN: Penatai Archbishop provinsi Gereja Anglika di Asia Tenggara, The Most Rev Datuk Bolly Lapok dikelaluka redak Kampung Entingan enggau penuh adat asal lebuh iya diberi basa bejadika rumah baru enggau rumah tangkir St Michael enggau Chapel All Angels.
Raban ke ngelaluka penatai iya, nyengkaum bala nembiak Ngajat Iban ngepan asal bansa Dayak; bala indu ke betabuh; bala tuai gerija; enggau bala eklisia nyengkaum ari genturung ke besemak dia baka Kampung Nangka enggau Kampung Melaban.
Chapel nya didirika kena 29 Sept 1949. Keterubah iya digaga ari kayu beatapka apung ngena chara beripai. Bisi sekali dalam taun 1954, Chapel nya rubuh dipangka biaubalai taja pan lalu digaga baru.
Rambau diatu orang ke meli rumah semak ditu mega besembiang di Chapel ke semina muat urung 200 iku sekali sembiang. Tang lebuh pengerami Easter enggau Krismas, orang ke besembiang bediri tauka duduk di luar setegal nadai chukup tempat duduk.
Rumah baru enggau tangkir nya tembu dalam taun 2012. Chapel nya mega disikap enggau airkon tang payung rumah nya deka disemin ngambika nyamai nangkir rumah nya jemah.
Kemari Bolly, ke lalu nyadi Bishop Diocese Kuching, Sarawak enggau Brunei Darussalam nguluka servis sembiang; sama ngulu raban gerija bukai ngirup pagi ba Sekula Kebangsaan (SK) St Michael; sembiang merekat lumpung baru sekula enggau dinding semin mega tanah ke baru dibeli ungkup pendam Keristin enda jauh ari nya.
Pendam nya ukai semina diungkupka ngagai redak Kampung Entingan tang mega Kampung Nangka.
Kemari Bolly sama bela beserumpu enggau redak bukai merarau ba Balai Besai Lenggai ke alai sida dijamu enggau pemakai asal seraya beperindang enggau pangan pemerindang sereta muzik kontemporari.
Bejaku maya beserumpu makai tengah hari , Bolly madah, beguna bendar peranak Sarawak ngetanka pemaik enggau penegap. Iya madahka peranak menua aruh bebaik antara semua raban bansa ngambika mayuh bengkah penusah ke nyadi di menua bukai nya enda nyadi ditu.
“Anang bejaika orang ke semak diau enggau kitai lalu terima peranak bukai ke enda sama bansa enggau kitai. Sarawak nengeri ke nyelai setegal ulih ngetanka penyerakup sereta pemaik semua pupu raban bansa,” ku iya.
Bolly nangkan orang keristin nya semua pemeri enggau berekat datai ari Tuhan keba nya enda tau ngejang ari Tuhan ke Bekuasa.
Iya mega ngelalau sida enda masau pan ke diberi perintah ngagai genturung pendiau, sekula enggau gerija. Bekaul enggau pekara tu mega Gereja Anglika deka ngambi seiku pemesai endang ditagaka ungkup ngemata sereta meri riput ba pekara duit pan, keleibih agi duit iya ke diberi ngagai gerija sereta chapel.
Bela datai ngagai pengerami nya Tuai Rumah Kampung Entinggan TR David Jiku Nader; paderi ke nguasa Gereja St Francis Rt Rev Dennis Gimang ke mega ngemataka 12 bengkah chapel bukai nyengkaum St Michael enggau All Angels; Vikar Gereja St Faith Rt Rev Nelson Ugas enggau sab-deakon Chapel Stanley Chua How Leong, Chairman lay reader Rectakar Dunstan Johore, kepala pengajar SK St Michael Kueh Jee Moi enggau chairman pengatur Lian Boonsin.
Sekeda ari ketuai raban bansa ke bisi datai mega Penghulu Lawrence Pau enggau Tuai Rumah Kampung Nangka Minggu Julang sereta redak bukai.