DIKEMEGAH: Gambar mandangka Hevance lebuh merindang mensia mayuh di Hotel Hard Rock Penang apin lama ke udah.
KUCHING: Industri muzik Dayak aruh temegah setegal kelai ke diberi ngagai Band Hevance ngujungka sida dikangau merindang di Hotel Hard Rock Penang bedau lama ke udah.
Sapit presiden Gerempung Penyungkak Seni enggau Main Asal Dayak (PPSKDK), Isa Lee madah tu sebengkah pekara ke tau dikemegah industri setegal Hevance udah diberi basa enggau awak merindang mai lagu Iban ba sebengklah palan pemerindang ke tebilang baka Hard Rock.
“Nengah peluang tu, Hevance udah ngerandang jalai ungkup industri muzik Dayak. Aku arap nya deka muka jalai lalu meransang orang bukai ngambika ngembuan timpai sereta juluk ati ke tinggi. Aku arap mayuh orang deka nitihka singkang kaki sida.
“Sebengkah pengering ba Hevance nya sida landik ngelakuka band, nya ngasuh sida tebilang.Sebendar iya pemanah lagu enggau musik aja enda chukup nyema artis enda tebilang tauka enti sida nadai peminat,” ku iya.
Hevance, menang Best Indie Rock Group of South East Asia dalam Gelar VIMA 2013 di Kuala Lumpur kena undang merindang ba Kafe Hotel Hard Rock kena 14 September.
Sida nyada seregan lagu Rock Iban nyengkaum lagu hit sida ‘Aku Nemu’ enggau ‘Bajik’ lalu tebal agi orang ke mending sida nya orang ke enda nemu Jaku Iban, lalu sekeda ari orang ke datai mending sida nya tekenyit meda muzik ke baka nya ulih disada dalam jaku baka Jaku Iban.
Raban Hevance, Aldrich (vokal enggau gitar), Nathaniel Philip (kibod), Gideon (deram), Joners (gitar lead) enggau Lucas (bass). Sida keterubah iya tebilang nengah lagu hit ‘Aku Nemu’, ke menang Lagu pengambis Manah ba Anugerah Juara Rentak Ruai (AJARR) dalam taun 2012.
Lagu nya mega menang Lagu Pengambis Manah ba Anugerah Muzik Dayak (AMD) taun nya mega Gelar ‘Media Social Paling Kaw’ dalam Gelar Era Borneo Charts 2012. Lagu hit baru ‘Bajik’ udah nya menang lagu pengambis popular dalam AJARR taun tu tadi di Sibu.
Ba kaul bukai, Isa nyebutka pengirau ati iya dalam pengelabuh ba sentang pemanah lirik lagu Iban ke alai mayuh orang udah mantaika sebana sida.
Setegal tu, iya ngarika penulis leka lagu enggau penulis lagu PPSKDK, enda tau enda bejimat sebedau ngeluarka lagu ngambika kualiti jaku setikas enggau peminta peninga.
“Sida aruh minta iring ari orang ke landik dalam ngena Jaku Iban Setindit. Rambau diatu, mayuh orang landik dalam Jaku Iban lalu sida nya sensitif ba pekara tu.
“Anang malu betanya, laban enti lirik nya enda manah sereta jaku ke bekenaka jaku enda engkeman tu tau nyima ati peninga. Sida ke dalam industri tu dilalau ngena Bup Serebareti Iban ke bisi diatu,” ku iya.