PENYULUT: Fatimah (duduk tengah) enggau Rosey nunjukka bup Sarawak Women in Politics ngagai Morley (duduk kiba) enggau sida ke bukai. — Gambar Jeffery Mostapa
Nyengkaum dalam politik, pengawa dagang, sektor perintah enggau peribit
KUCHING: Perintah nengeri nengah Universiti Malaysia Sarawak (UNIMAS) deka besaup bejalaika pengawa pemansik enggau Universiti Kebangsaan Malaysia (UKM) bekaul enggau orang indu nyadi ketuai tauka ngaga pemutus.
Menteri Pengintu Pengelantang, Orang Indu enggau Pemansang Ruang Bilik Datuk Fatimah Abdullah madah, beduduk ari pekara nya sebengkah licha mensia mayuh deka diatur begulai Pusat Kepimpinan Wanita Tun Fatimah Hashim di nengeri tu taun baru.
Lalu asil ari pengawa pemansik nya deka dipejuraika maya licha mensia mayuh nya, ku iya.
“Taun baru nyin ila, bulan April 2014 kitai deka ngatur licha mensia mayuh, ti ngenang pekara Lost Leaders, tang enda sebaka enggau ti diatur ba Sabah. Maya nya ila kitai ngangauka baru Penyandang Kerusi Kepimpinan Wanita, Pusat Kepimpinan Wanita Tun Fatimah Hashim, UKM, Profesor Louise Morley Morley.
“Laban kitai arap bendar deka ke pengari orang indu mayuh agi dalam pengawa ngaga pemutus, kitai enda ulih ngereja kediri tang patut bekerejasama enggau menua bukai,” ku iya seraya madahka penyampau orang indu Sarawak ti ngaga pemutus udah manggai urung 12 persin enti dibandingka enggau Semenanjung Malaysia 32 persin.
Fatimah mansutka pekara nya dalam aum pengarang berita lebuh ti nerima penemuai basa Penyandang Kerusi Kepimpinan Wanita, Pusat Kepimpinan Wanita Tun Fatimah Hashim, UKM, Profesor Louise Morley, ti diatur ba opis iya di Bangunan Baitulmakmur ditu, pagi kemari.
Berebak enggau tu, Morley dalam aum pengarang madah, sebedau licha mensia mayuh nya diatur dia sebengkah pengawa pemansik bekaul enggau orang indu nyadi ketuai tauka ngaga pemutus deka diatur dulu.
“Pengawa pemansik nya ukai semina orang indu dalam politik tang nyengkaum dalam pengawa dagang, sektor perintah enggau peribit sereta ke bukai, pia mega ukai semina dipejalaika ba orang indu di kandang mengeri tang mungkur di menua pesisir,” ku Morley.
Kelimpah ari nya, Fatimah madah pukul rata orang indu Sarawak ti kereja lebih tinggi ari penyampau renggat bansa.
Taja pia ku iya, nengeri tu betapi enggau pemayuh orang indu ke diambi kereja dibandingka enggau orang lelaki.
Renggat bansa (Malaysia), penyampau pukul rata orang indu ti kereja iya nya 46.9 persin.
“Penyampau pukul rata orang indu Sarawak ti kereja lebih tinggi ari renggat (pukul rata) bansa, iya nya kitai (Sarawak) bisi 53.2 persin.
“Enti dipeda pemayuh orang indu ti masuk sekula tauka institut pelajar tinggi seruran nambah sereta lebih manah dibandingka enggau lelaki, tang enti datai ba kereja bakani gaya kitai indu,” ku iya.
Berebak enggau tu Direktor, Pusat Kepimpinan Wanita Tun Fatimah Hashin, Universiti Kebangsaan Malaysia (UKM), Prof Madya Dr. Madeline Berma madahka entara aktiviti palan nya ditumbuhka dikena bejalaika pengawa pemansik ba orang indu ti nyadi ketuai, sereta deka begulai enggau Sabah Sarawak dalam bejalaika pengawa pemansik bekaul pekara nya.
Sama datai dalam aum pengerang berita nya kemari, Menteri Muda Pemansang Ruang Bilik enggau Pelajar Anak Mit Rosey Yunus sereta Direktor Biro Wanita Norjanah Razali enggau kebukai.