Kem Piasau deka digizit enggau naka pengelengkas: Talif

0

KUCHING: Perintah Nengeri deka ngelengkas atur ngizit Kem Piasau di Miri nyadi rizab kampung pengudah pemati burung kenyalang ke benama ‘Faridah’, Hari Dua tu tadi.

Menteri Muda Rampa Menua Datu Len Talif Salleh ti kesal enggau pekara nya udah ngansak undang-undang ti terit diletak ngagai orang ti munuh bansa burung ke dijaga nya.

Enti ditemu salah ku Talif, orang nya tau diukum mata duit sepenyampau RM25,000 tauka tiga taun jil tauka kededua nengah ‘Ordinan Perlindungan Hidupan Liar (1998)’.

“Aku berasai chukup kesal ketegal kededua burung kenyalang nya, Faridah enggau Jimmy sigi idup begulai. Enti seiku mati, Jimmy deka sunyi lalu enda ulih idup lama.

“Berindik ari pekara nya, Kepala Menteri Pehin Sri Abdul Taib Mahmud ba aum kabinet kemari (Hari Empat) udah ngerah aku ngelengkaska atur ngizit kandang endur nya nyadi rizab kampung,”ku iya.

Iya mansutka jaku nya pengudah ngulu aum pengarang berita Festival Antarabangsa Sains, Teknologi, Kejuruteraan dan Matematik (STEMFest) 2013 Malaysia di Tingkat 20, Bangunan Wisma Sumber Alam ditu, kemari.

Talif nambah, semua pansik ba Kem Piasau ungkup pengawa ngizit nyadi rizab kampung udah digaga lalu benung nganti atur pansik bukai.

“Kami ngembuan penerang ke silik senentang kandang endur nya tang kitai patut nemu pengawa ngizit begunaka awak ti panjai.

“Tajapia, aku nadai ninga sebarang bantah senentang pemutus ngizit Kem Piasau nyadi rizab kampung. Enti nadai bantah, atur ngizit ulih dilengkas, engka ujung taun tu tauka tumu agi ari nya.

“Enti udah digizit nyadi rizab kampung, kandang endur nya ulih dikemansang baka Taman Botanikal di Stutong. Syarikat Petronas enggau Shell sedia nanggung belanja ngangkatka palan nya nyadi taman nengah ungkus RM10 juta,” ku iya.