Kes denggi ba Sibu ngenyit niki

0

SIBU: Kes penyakit denggi ba sitak Sibu ngenyit niki ari 33 nyentuk ke 124 iti kes naka 14 September tu tadi ba timpuh ke sebaka taun seiti nyin kemari.

Nitihka stastitik ba minggu ke-36, penyampau semua kes denggi ba serata Sarawak iya nya 962 iti kes enti dibanding 736 iti kes ba timpuh ke sebaka taun 2012.

Sitak Kuching ngerikut 112 iti kes lalu ditangkan Miri (82), Lawas (78), Bintulu (75), Sarikei dan Kapit (55), Betong (47), Pakan (34), Sri Aman (33), Saratok (31), Belaga (27), Lubok Antu (24), Kanowit (23), Serian (19), Song (19), Marudi (18), Meradong (16), Selangau (14) enggau Tatau (12).

Direktor Opis Pengerai Nengeri Datu Dr Zulkifli Jantan madahka, opis sida semampai ngemeratka kes nya.

“Taja pan penyampau kes tu mayuh agi ba timpuh ke sebaka taun seiti nyin tadi, tang penyampau kes ninting minggu agi ba tikas bejaga-jaga kenyau beberapa bulan tu.

“Kitai ngarapka mensia mayuh semampai besaup munaska igi penyakit ke dibai nyamuk tu,” ku iya maya dikerandau, kemari.

Maya ditanya nama kebuah penyampau kes nya ngenyit niki, ku Dr Zulkifli iya enda tentu nemu kebuah.

“Nyangka pun penusah tu bepun ari gaya hari enggau ulah mensia mayuh empu,” ku iya.

Iya mega nangkan mensia mayuh semampai ngemeratka pemeresi kandang pendiau ngambika igi penyakit ke dibai nyamuk ulih dipunaska.