Sabtu: Kes makai dadah di Serian balat ngirauka ati

0

SERIAN: Kes makai dadah di Pelilih Serian ti majak nambah ba taun 2013 balat ngirauka raban polis.

Kepala Polis Menua Sarawak, Senior DCP Dato Wira Muhammad Sabtu Osman madah penyampau kes nya udah nambah 40 iku enti dibandingka enggau penyampau ba taun 2012.

“Penyampau orang salah makai dadah ke ditangkap ba taun 2012 iya nya 150 iku. Taun 2013 tu kitai udah nangkap 190 iku, retinya penyampau tu nambah 40 iku lalu kitai patut beratika kebuah kes tu majak nambah ditu.

“Aku udah ngerah KPD Serian ngadu kerejasama enggau Kepala Opis Narkotik di Kuching ngambika bela begigaka jalai ngurangka penyampau kes dadah ditu.

“Enda mega tau ngasuh kitai irau, tang semina kitai enggai meda mayuh agi rayat Serian teparuk enggau penyalah makai dadah,”ku iya lebuh dikerandau pemberita maya nemuai ngagai Opis Polis Pelilih (IPD) Serian ditu, kemari.

Ba penemuai keterubah iya ngagai opis polis nya, Sabtu bisi mega meresa baris raban polis, nyain bup temuai sereta mendingka penerang ari raban polis Serian.

Iya mega madah, rikut penyalai jai di Serian ti diuan 141,200 iku orang udah nurun 40 persin enti dibandingka enggau taun 2012.

Ku iya, statistik nya ukai sengapa digaga lalu iya muji raban polis Serian ti udah bejalaika tanggungpengawa enggau manah.

Ba kaul ke sama, iya ngarap nengah ‘Akta Pencegahan Jenayah’ ti baru udah ditumbuh Menteri di Opis Menteri Dalam Menua (KDN) kemari, atur ngintu pengelikun rayat deka muntang agi dikereja.

“Ngelamatu kitai ngena akta CPC, enti dikena begulai enggau ‘Akta Pencegahan Jenayah’ ti udah dikemendar, rayat kitai deka idup enggau likun sereta lantang,”ku iya.

Ngenang senentang OPS Cantas, Wira madah, polis udah meresa 3,354 iku bansa China, 4,235 Melayu, 21 India enggau 4,074 bansa bukai.

“Penyampau semua ti udah diperesa diatu iya nya 11,884 iku. Kitai udah nangkap 93 iku bansa Melayu, China 100, India 1 sereta 114 iku bansa bukai.

“Kelimpah ari nya, kitai udah meresa 9,905 buah perengka pengangkut nyengkaum entukar enggau mutosikal ke alai 851 saman udah dikeluar,” ku iya.

Kepala Polis Pelilih (KPD) Serian, DSP Mohd Jamali Umi madah naka ke diatu polis nadai nangkap orang ngereja pengawa jai baka bala bayat sereta ke bukai.

Nyaut tanya pemberita, iya netapka van sapu ke mai lebih orang tambang deka disaman tauka diukum mata duit enti ditemu salah.

Polis merambu ngatur mayuh agi sekat ba jalai alun begulai enggau JPJ ngambika tau nyeliah penyalah nya ari majak nyadi.