Basa ngagai orang lama: Harden

0

SRI AMAN: Kubu Alice ke nyadi sebengkah palan besejarah di Sri Aman deka dikemansangka baru nyadi Muzium Pesaka Sarawak, ku Menteri Muda Pemansang Menua Pesisir enggau Berumah Datuk Francis Harden Hollis.

Ku iya, projek ke begunaka ungkus RM5 juta nya udah berengkah ba bulan Mei tu tadi lalu dipelabaka tembu ba ujung taun siti nyin ila.

“Pengawa ngemanahka baru rumah ke penuh sejarah nya udah berengkah ba bulan Mei tu tadi iya nya perintah enda deka ngubah tukuh rumah, tang semina kitai begunaka ramu baru baka kayu belian.

“Baka nya mega ba dalam rumah nya ila deka disikap enggau perengka teknologi moden,” ku iya maya dikerandau pemberita sepengudah bejadika ‘Community Engagement Programme’ nyerumba ‘Projek Pemuliharaan dan Menaik Taraf Kubu Alice’ nyadi Muzium Pesaka Sarawak di Dewan Suarah ditu, bedau lama ke udah.

Harden madah, enti rumah nya udah tembu ila, bala temuai kelebih agi maya pengerami Pangka Bena Sri Aman mega bisi awak mandangka video gaya bena enggau sukut pemandang bekaul enggau barang ke lama sereta pemansang bandar Sri Aman.

“Tu meh antara sekeda pekara ke deka dibantaika kitai ba dalam rumah ke besejarah tu ila kelimpah ngetanka tukuh asal rumah baka ke ngelama tu,” ku iya.

Tandu Harden, pengawa ngemanahka Kubu Alice mega antara sekeda atur pemansang bandar Sri Aman ke benung dipejalai.

“Berebak enggau nya mega, kitai udah meda pemansang Tebingan Sri Aman ke udah tembu, pia mega Sri Aman deka bisi sebuah hotel tiga bintang ke deka tembu enda lama agi.

“Ukai semina nya aja, perintah mega bisi perambu ngemanjaika baru Tebingan Sri Aman,” ku iya.

Berindik ari nya, ku iya, pengawa ngemanahka baru rumah Kubu Alice tu sebengkah basa ari nembiak rebak baru ngagai orang lama ke udah mayuh bejalaika servis sida ngagai rayat.

“Tu meh chara dikena ngenang budi orang lama lalu nembiak rebak baru patut nyaga tetiap pesaka sejarah ke bisi di Sri Aman. Sida tu (orang lama) udah mayuh bejalaika pengawa ngetanka pesaka sejarah kitai,” ku iya.

Nyerumba enggau nya, iya ke mega Kaban Kunsil Nengeri (ADUN) Simanggang madah, Kubu Alice digaga ba taun 1864 nyadi palan endur ngetanka diri ari serang munsuh Rajah Brooke.

“Kubu Alice digaga di Skrang sebedau dipindah ngagai Sri Aman. Iya mega kala nyadi opis kaunsil bagi menua Sri Aman,” ku iya.

Sama bisi datai Pengarah Muzium Sarawak Ipoi Datan, Residen Sri Aman Jonathan Lugoh, Temenggung Sii Toh Peng, Pemancha Samuel Lawen, Pemancha Mas Shamsiah Maslem, Penghulu Abdul Samad Abdul Rahim enggau bala tuai opis perintah.