Omar: Pengawa nganjung juruteknik ngulu kos pandak semina ngerua duit masau hari

0

KUCHING: Presiden CUEPACS, Dato Omar Osman (gambar), nyadang juruteknik ke udah lebih 30 taun ngereja pengawa ba opis perintah sereta dianjung ngulu kos pandak pandak motivasi tiga hari dua malam (3H/2M) ngagai sebarang palan tauka sitak menua, semina ngerua duit masau hari.

“Ba aku, lebih 30 taun nyadi juruteknik ba opis perintah, dianjung ngulu kos 3H/2M ngagai sebarang endur di menua tu mandingka kos motivasyen nya nadai guna tang masau duit enggau hari. Kapa nganjung kos 3H/2M?

“Pengawa nganjung juruteknik ngulu kos pandak baka nya enda ulih nyungkak pengelandik sida ba batang pengawa. Enti dianjung kos entara 3-6 bulan ba bidang ke bekaul, nya enda ngawa.

“Ambika banding, sida ke dianjung ke Langkawi 3H/2M mendingka licha, tembu kos sida lalu belelak bebelika barang di Langkawi, udah nya setipikit enda nemu kini tunga, nyau nyadi uras,” ku iya madah lebuh dikerandau ba aum media Konferens Nasional Keterubah ke raban Juruteknik & TVET Semi-Professionals (SwakCREATE 2013) di Hotel Hilton ditu, kemari.

Baka juruteknik, kos motivasyen enda patut digulu sida tang manah agi dianjung praktikal ke endang bisi kaul enggau pengawa nyadi juruteknik.

Bansa kos ke patut digulu juruteknik mayuh ngena chara praktikal lalu mimit teori.

“Enti teori, manah agi macha bup ba librari. Baka praktikal, juruteknik sigi ngelala lalu kala megai ‘piston’…Nya utai ke betul,” ku iya.

Kelimpah ari nya mega, Omar merambu semua juruteknik di menua tu patut diberi uniform kena sida gawa, baka ke dipejalaika Petronas.

“Uniform tu pekara baru ba pengawa Penulung Injinir laban pengawa bansa tu pengawa ke profesyenal. Ba aku, endang patut nama juruteknik  diubah nyadi Penulung Injinir ngena baju uniform baka orang profesyenal,” ku iya.

Ba pekara ke sebaka, Omar madah pengereja pengawa sukung dalam opis perinah mega nyangka deka ditukar nama ngagai ‘Kumpulan Perlaksana’ Gred 1- 40 enda lama agi.