Penyampau enda baka munyi ke disebut

0

SIBU: Kepala Polis Menua Sibu ACP Shafie Ismail ningkah penerang ti madahka ari 16 penyampau gerup gangster di Sarawak sekeda nya bisi ba sitak Sibu.

Iya madah, penerang nya jauh besibil enggau gaya ke bendar ti bisi nyadi ba sitak tu.

“Tang enti kitai nyebut raban tauka gerup samseng, diatu Sibu bisi tujuh gerup samseng.

“Raban tu enda sebaka enggau raban gangster laban penyalah ke dikereja sida semina bekaul enggau penyalah baka nyabung, enchuri kayu balak, bejudi tauka penyalah bukai tang ukai penyalah ti besai baka ngeruga pengelikun mensia mayuh,” ku iya.

Shafie mantaika penerang nya maya Program Randau Begulai enggau Media 2013 renggat Nengeri Sarawak ba sebengkah hotel tebilang ditu, kemari.

Program nya diatur begulai Opis Menteri Pemadah enggau Penyambung (KKMM) enggau Opis Pemadah Malaysia.

Shafie madah, opis sida ba sitak tu enda kala ditanya dulu sebedau mantaika penerang nya.

Bekenangka raban samseng ba Sibu, ku iya, tebal agi penyalah dikereja raban tu bepun ari mabuk tauka berekak ba sebelah palan pemerindang.

Nya alai, iya enda nyalam mayuh kes bekaul enggau raban nya diputarka nengah chara berandau entara diri sama diri.

“Enti agi suba ba taun 2005 ngagai 2006 iya nya ba Ops Cantas Kenyalang, di Sibu bisi 25 iku kepala samseng ti diasuh ditangkap nengah ‘Emergency Ordinance’ (EO).

“Ba taun 2007, maya aku baru datai gawa ditu, ari 25 nya 17 iku udah ditangkap.

“Tang diatu kitai ulih nyebut Sibu likun enti dibida ari menua bukai lalu penerang madahka ari 16 iti raban gangster nya bisi di Sibu enda amat,” ku iya nerangka baru.

Nambahka nya, Shafie madah, sekumbang Ops Cantas, polis enda kala nangkap raban gangster di Sibu.

“Kitai mega nemu bisi orang luar madahka Sibu tu mayuh raban gangster.

“Tang sida enda nemu Sibu sebengkah menua ti likun enti dibida enggau sekeda menua di Semenanjung.

“Kitai ulih mantaika pengamat tu bepelasarka rikut tauka kes ke bisi diriput nyadi di Sibu.

“Dalam kandang sehari, semina urung empat iti aja kes bisi nyadi lalu dua iti nya kes bekaul enggau pengelenyau kerita tauka mutosikal aja,” ku iya.

Empai lama tu tadi, Sekretari Opis Menteri Dalam Nengeri, Datuk Seri Abdul Rahim Mohamad Radzi madah, ari 49 iti raban gangster 16 iti raban bisi di Sarawak.

Raban tu iya nya Ah Ngau, Batu Tiga, Ah Feng, Batu 10, Sibu Ti, Ah Seng, Ah Chin, Lee Lung, Lo Han, Sungai Merah, Sungai Bidut, Ting Ching Lee, Tua Cak Lee, Teksi Station, Pintu Merah enggau Krokop.