KUCHING: Seiku pemesai Parti Pesaka Bumiputera Bersatu (PBB), Datuk Abdul Karim Rahman Hamzah madah, iya enda tekenyit enti Parti Tindakan Demokratik (DAP) muka pampang parti nya di Pakan enti sitak nya enda dijaga enggau manah.
Iya madah, DAP deka angkat tauka enda di Pakan bepanggai ba injin komponen Barisan Nasional (BN) dia empu.
“Enti wakil rayat BN ke diatu nyaga sitak Pakan enggau manah, iya tetap deka nyadi kubu kuat BN…Tang enti agi bisi penyarut dalam BN empu tauka sitak nya enda dijaga enggau manah, aku enda tekenyit enti DAP deka angkat ba sitak nya,” ku Menteri Muda Pemansang Nembiak nya madah nengah pesan jaku pandak (SMS), ensanus.
Kaban Kunsil Nengeri (ADUN) Asajaya nya ditanya bekaul enggau penemu DAP ke deka muka komiti protem di Pakan, alai chairman parti (DAP) nengeri Chong Chieng Jen madah, parti nya deka betangkup enggau ADUN Pakan ke diatu, Tan Sri William Mawan Ikom dia ila.
Chong, ti mega Kaban Parlimen (MP) Bandar Kuching enggau Kaban Kunsil Nengeri (ADUN) Kota Sentosa madah, naka ke diatu bisi 55 iku kaban komiti protem nya, lalu nambah pampang DAP Pakan deka dibuka, udah parti nya bulih pemendar ari Opis Pengerejister Gerempung (ROS) enda lama agi.
Abdul Karim madah, Pakan kubu kuat BN, lalu kerusi nya tetap tegap tang bepanggai ba injin komponen BN ba sitak nya empu kelimpah ari sitak nya patut dijaga enggau manah.
“Tiap sitak pengawa bepilih dikemeratka BN. Nadai siti kerusi patut ditetapka menang,” ku Menteri Muda Pengawa Berumah nya nandu.