Seiku indu Penan parai maya nurun deka ngaga tingki

0

MIRI: Bejalai beberapa kilometer penyauh ketegal deka ngaga tingki, seiku indu Penan parai ba kes bebadi jalai alun ba Jalai Lutong-Pujut kemari.

Mansa, Julan Batang, 42, ari Long Palai, Ulu Baram parai ba palan penyadi, iya patah lengan sereta untak becherayan ba sebelah jalai alun ketegal ke dilantak sebuah bas ke deka nuju ngagai puak pasar Miri.

Nitihku penerang laki iya, Upek Usan, 48, madah sebedau kes nya nyadi pukul 9 pagi, seduai bisi bepegai jari maya deka ngelayang jalai enda jauh ari flyover Bulatan Pujut.

“Taja pia, jari iya tebeleka ari pegai aku lalu aku terus ngelayang jalai seraya nganti iya ba seberai. Maya iya benung bediri ba tengah jalai, dia sebuah bas datai ari Lutong lalu ngelantak iya,” ku Upek ke benung sesingut nyabak maya berandau enggau pemberita.

Seduai merambu deka nemuai ngagai kaban belayan ba Piasau sebedau ngelawa Opis Pengerejister Bansa (JPN) laban deka ngaga tingki.

Seduai bisi tiga iku anak, semua lelaki beumur antara lapan bulan enggau 2 taun, nyiwa ba Sungai Adong.

Bangkai Julan udah dianjung ngagai Sepital Miri ngambika dibuntastasat.

Kepala Polis Miri ACP Mun Kok Keong madah, polis benung mansik kes nya nyengkaum ngambi penerang ari deriba bas kena mantu tasat polis.

Berindik ari nya, Mun ngelalau penguna ngambika semampai nyaga pengelikun diri maya betengahka jalai alun kelebih agi ngelayang jalai maya jalai sekut.