SPDP Pampang Marudi nyangkal udah ‘direrak’

0

Bisi nganjung 10 pengari, 23 pemerati ba AGM di Bintulu, majak ngerejister mayuh kaban baruMARUDI: Parti Demokratik Progresif Sarawak (SPDP) Pampang Marudi bisi nganjung 10 iku pengari enggau 23 iku pemerati ngulu Aum Besai Ninting Taun (AGM) SPDP di Bintulu.

Ketuai Raban Nembiak SPDP Pampang Marudi, Abdul Rahim Jaraee ningkah propaganda ke dipansut ti madahka SPDP Pampang Marudi udah ‘direrak’.

Rahim ke ningkah dawa nya madah, maya AGM bagi pampang nya lebih 5,000 kaban ke udah direjister ba sitak Marudi lalu di Telang Usan bisi lebih 2,000 iku kaban.

“Lis nama kaban bisi dirikut ba Riput Sekretari Besai SPDP. Nya alai, enda patut SPDP udah ‘direrak’ di Marudi,” ku  Rahim.

Berebak enggau nya mega, Chairman SPDP Pampang Marudi, Alexander Asing Sadai madah Pampang Marudi diatu majak aktif nengah pengawa ngerejister mayuh kaban baru.

Antara pengari ke bisi ngulu aum nya di Bintulu mungkur Chairman Pampang (Ketuai) baka Tuai Rumah (TR) Benang Pilang, Edward Mendai, TR Kompeni Agon, TR Jubin Sigai, TR Musin Radin, TR Henry Gomes, Wahid Sayun, Alek Jilum enggau Theresa Gelang ke mega Ketuai Orang Indu SPDP Pampang Marudi.

Kelimpah ari nya, AGM nya udah dipenyadi presiden parti ke mega Menteri Pemansang Rama, Tan Sri William Mawan Ikom ke mega bisi digulu lebih 400 raban deliget ke dipilih ngarika pampang diri empu.