Monday, November 29

Raban bansa Iban semampai dikepapaska orang luar

0

KAPIT: Pemansang ke diatur perintah ngagai rayat menua pesisir kelebih agi ba raban bansa Iban semampai dikepapaska orang luar ti enggai meda raban bansa tu bela mansang baka bansa bukai.

Sapit Kepala Menteri Datuk Patinggi Tan Sri Alfred Jabu Numpang madah, ninting bisi pengawa bepilih diatur semampai bisi parti ari luar nguji ngerachun runding raban bansa Iban ngambika bela ngenggaika program pemansang ke dibai perintah ngagai menua pesisir.

“Ba pemendar orang luar enggai meda perintah ngatur pemansang ba menua pesisir, sida enggau naka alah matak bansa kitai enggau sida nyakal perintah.

“Tang kitai nemu pengawa nya nadai mai penguntung kelimpah semina mai pengerugi ngagai bansa kitai ba menua pesisir,” ku iya.

Iya mantaika jaku nya maya bejadika Aum Besai Tuai Raban Bansa Iban Sarawak 2013 ba Kubu Slyvia ditu, lemai ensana.

Pengerami nya bela digulu Menteri Pemansang Tanah Tan Sri Datuk Amar James Jemut Masing, Menteri Pemansang Rama Tan Sri William Mawan Ikom, Menteri Ba Opis Menteri Besai Datuk Joseph Entulu Belaun, Sapit Menteri Pemansang Menua Pesisir enggau Kandang Menua Datuk Alexander Nanta Linggi ti mega chairman komiti aum enggau bala pemesai Iban ke bukai

Aum ke berengkah diatur belabuh 11 ngagai 13 Oktober tu berambaika leka jaku ‘Mansang Pegari’ bisi digulu lebih 100 iku raban tuai bansa Iban ari serata nengeri tu.

Jabu madah dalam kandang tujuh taun ti deka datai ba tuju ngelawa Wawasan 2020, raban bansa Iban nadai chara bukai kelimpah ari beserakup enggau pangan diri ngambika ulih nyeliahka diri ari pambar ketegal diasut orang ti kepapaska pemansang ke diatur perintah.

“Orang ba mengeri udah lama mansang. Pemansang udah silik diasaika sida magang.

“Tang kitai ba menua pesisir deka semampai tinggal belama enti kitai enda ulih begulai enggau pangan diri,” ku iya.

Bekenangka aum ke diatur keterubah iya sepengudah 51 taun ke udah, ku Jabu, bala tuai raban bansa ke enggau aum nya patut bekenaka awak tu alai neritka adat, neritka bansa enggau nyintalka kaul ngambika bansa Iban ulih dipebasaka bansa bukai.

“Keterubah aum tu diatur kena 15 Februari 1962 suba ba endur ditu mega (Kubu Slyvia).

“Maya nya niang Tun Jugah Barieng nesau semua tuai raban bansa Iaban di Kapit nyengkaum Sibu berandauka pemutus deka nyengulai besaup nempa menua Malaysia.

“Aum tu bisi digulu 51 iku aja tuai raban bansa lalu semina Penghulu Kumbong anak niang Penghulu Gerinang aja ke agi meruan enggau kitai nyentuk ke diatu,” ku iya.

Jabu madah, bepun ari aum nya, rayat ba nengeri tu patut berasai temegah ati laban tuai raban bansa dulu suba ngaga pemutus ti engkeman nyengulai besaup nempa menua Malaysia.

“Nyema bala tuai raban bansa kitai maya nya enda berunding panjai, kitai nyangka enda ngasaika pemansang enggau pengelantang pengidup baka ke sehari tu.

“Tang bansa kitai mega mujur ngayanka penyerakup enggau pangan diri, enda ngelebu pemutus ari aum nya.

“Nya alai, maya menua tu dikeruga komunis menya nguji deka numbangka penyerakup Malaysia, sida enda mujur laban kitai kering beserakup enggau pangan diri,” ku iya nambahka baru.

Ba aum tiga hari berunggu tu, bisi tiga pekara besai deka dipejurai.

Sebengkah ari nya pasal ‘The Philosophy, Principles And Factor Contributing To Rural-Urban Migration’ enggau ‘The Social-Economic Impacts Of Rural-Urban Migration On Iban Women And Youth’, pekara kedua ‘The Impact Of Rural-Urban Migration On Iban Culture And Tradition’ lalu pengujung bendar ‘Iban Community Leaders: Their Roles And Functions’.