Saturday, January 23

Sida ke kena tasah bot ekspres karam beterima kasih ngagai perintah

0

KAPIT: Nyentuk ke sehari tu Lily Duren, bini niang Tujok Lah ke bebadi maya bot ekspres karam ba Giam Bungan bulan Mei suba mengkang sinu maya ngenang anak pengkuan iya ke baru beumur lima taun semampai nanya sereta nganti pemulai niang.

Ku Lily, bala anak iya kebukai, semua enam iku, lalu ke pemadu tuai diatu ba Pom 6 Atas kelimpah iya ke pengkuan, Selfa Tujok, udah nerima pemidang niang apai sida.

“Tang aku semampai sinu maya Selfa nanya kemaya niang pulai baru,” ku iya madah ngagai pengarang berita maya Pengawa Nyuaka Bantu ngagai bala ke ditinggang penusah bot ekspres Kawan Mas karam ba Giam Bungan bulan Mei tu tadi.

Kelimpah ari nya ku iya, Selfa sebedau penusah nyadi bisi nerima perais ketegal mujur bulih penuduk lumur tiga ba peresa di sekula.

Tang perais lalu apin dibuka laban ku Selfa nganti niang apai iya pulai dulu.

“Kami sebilik sinu bendar maya Selfa muka perais ke diberi sekula sepiak lungun maya nyenggai niang apai iya,” ku iya nusi.

Lily, 39, mega madah sekumbang pemidang niang laki iya, bala menyadi iya ke bukai suah mantu nyuaka belanja laban iya endang nadai kereja nambahka bala anak besekula magang.

“Tang aku meri besai terima kasih ngagai perintah laban nyengkaum serak tu aku bisi nerima bantu duit dikena ngelempung belanja kami menyanak,” ku iya.

Keterubah ku Lily, iya nerima bantu RM1,500 lalu serak tu iya sekali agi nerima RM10,000 ari Opis Pengelikun Bansa (MKN) enggau Yayasan 1Malaysia.

Bela ngasaika penyinu baka Lily, laki niang Roslin Jati, Johnson Hock Chiong bisi nusika cerita maya iya enggau niang bini iya nguji ngidupka diri enggau anak seduai ke baru beumur lima taun maya penusah nyadi.

“Maya kami dalam bot ekspres beansak-ansak ngemansutka diri ari dalam bot ekspres enda memukai pegai jari niang tebeleka lalu nya ke penudi aku meda iya,” ku iya nusi enggau ati ti sinu.

Laban kelalu beansak-ansak iya enda ulih ngambi niang lalu beguai ngemansutka diri sambil merap anak seduai nyemerai ngagai tebing.

“Nyentuk ke sehari tu niang lalu empai temu.

“Dua minggu udah pengawa ngiga enggau ngidup dikemaduka, kami sebilik mutus ngatur pengawa ngerapuh niang,” ku iya.

Bepun ari nya Johnson ngarapka penyampau bot ekspres ngelawa menua Belaga ditambah ngambika penusah baka nya enda nyadi agi.

Ba penusah ke nyadi kena 28 Mei tu tadi, bot ekspres ‘Kawan Mas’ ke ditepan 222 iku orang nya datai ari Belaga ngelawa Kapit karam ba Giam Tukok, Bungan, Batang Rajang entara pukul 8.30 ngagai 9 pagi.

Ari penyampau nya, 219 iku mujur diidupka tang tiga iku bebadi lalu seiku (Roslin Jati) mengkang empai ditemu.