Site Last Updated 2:07 am, Friday

Nempa nembiak sekula landik, bepenau ba penemu teknologi

by Judan Bungap. Posted on October 23, 2013, Wednesday

MANTAIKA PENGELANDIK: Alexander (tengah) benung belagu nengah achara ‘Suara Emas’ ba pengawa nutup Pengerami Lumba enggau Main Ninting Taun SK Ulu Bawan di Kanowit.

Alexander Vincent arapka mayuh agi KR1M diagih ba sitak pegai iyaiku

KANOWIT: Program meri Komputer Pangku 1Malaysia (KR1M) dikeandalka ulih diberi enggau mayuh agi ba menua pesisir seririh enggau tuju perintah deka nempa nembiak sekula landik sereta bepenau ba penemu teknologi.

Ketegal pekara tu Kaban Kunsil Nengeri (ADUN) Ngemah Alexander Vincent madah, iya deka chakah ngatur peminta ngambika KR1M bela mayuh diberi ngagai DUN Ngemah.

“Kitai nangika nembiak sekula menua pesisir nadai pengelandik ba penemu teknologi lalu KR1M tu engkeman bendar mutarka penanggul tu,” ku iya.

Iya mantaika jaku nya maya bejadika pengerami nutup Lumba enggau Main Ninting Taun Sekolah Kebangsaan (SK) Ulu Bawan ditu, Hari Enam tu tadi.

Pengerami nya bela bisi digulu Chairman Gerempung Apai Indai enggau Pengajar (PIBG) SK Ulu Bawan Tiran Tinseng enggau Pemesai JASA Jelani Ajang.

Penatai Alexander serak tu mulaika pengingat iya ke kala besekula ba SK Ulu Bawan nya kenyau ari Primeri Satu nyentuk ke Primeri Enam maya niang apai iya kala nyadi Kepala Pengajar ba sekula nya.

Sekula tu mega mujur nempa beberapa iku pemesai ke bukai baka ex-Menteri Tenaga, Telekom enggau Pos Tan Sri Leo Moggie ke diatu nyadi Chairman Tenaga Nasional Berhad enggau Kaban Parlimen Kanowit Datuk Aaron Ago Dagang.

Ba pengerami nya, iya bisi nyuaka KR1M ngagai 12 iku nembiak Primeri Enam sekula nya.

Bekenangka pemansang tekonologi maya hari tu, ku Alexander, nembiak sekula menua pesisir berasai beruntung bendar laban ari KR1M, nembiak ulih neresa interenet kena nyungkakka agi tikas pelajar sida.

“Ari pemeri tu, nembiak sekula ulih nyaut tuju perintah deka ngemansangka pengelandik teknologi ngagai menua pesisir ngambika sebela enggau kandang mengeri,” ku iya.

Berebak enggau tu mega Alexander ngelalau rayat bagi menua pesisir ngemeranka pengawa beserakup ngereja sebarang pengawa.

“Enti rayat besepenemu, pengawa perintah ngatur projek pemansang deka muntang agi,” ku iya nambahka baru.

Udah nya iya ngerahka geran RM20,000 ngagai sekula nya laban ku Aleaxander ungkus nya tau dikena ngaga awak alai betugung ti beperapung lalu digaga chara beripai.

Print Friendly

We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Comments are closed.