KURANG IKAN: Gaya pasar basah enda tentu rami laban orang berikan enda turun ngagai tasik ketegal begelumbang.
MUKAH: Gaya pasar basah dipeda sunyi laban nadai mayuh ikan ke dipunggah ari perau nandaka musin ikan nyau datai ba pengunjung.
Tinjau Utusan Borneo ngagai pasar basah bedau lama ke udah meda pengawa bejual bebelika ikan kurang richah.
Selama tu enti musin ikan pasar basah ditu tau disebut baka begawai ikan lalu pengawa bejual -bebeli nya ukai main pengerichah.
Seiku pedagang ditu madah, diatu nya asil ke ditangkap sida ke berikan nya kurang laban kitai nemu diatu nyau semak musin landas lalu udah tentu tasik begelumbang.
“Beratika tasik begelumbang besai orang ke berikan enda ulih nurun ke tasik nangkap ikan.
“Nyema, orang berikan nya turun ga nya deka nyadika penekul ungkup iya ngulihka ikan sereta betapi enggau pengelikun diri,” ku iya lebuh ke dikerandau bedau lama ke udah.
Ku iya musin mayuh ikan nya urung bulan March ngagai April.
“Maya nya mayuh orang berikan turun ke tasik laban musin nya tasik enda begelumbang.
“Kadang-kadang, musin ikan datai tumu agi ari bulan March iya nya bulan Februari pan udah mayuh asil tangkap kami,” tambah iya.