Jasa raban veteran ATM seruran dikeingat

0

KUCHING: Belanja RM48 juta ti diungkupka dalam Bajet 2014 nunjukka perintah seruran bebasa sereta temegahka servis tauka pengawa veteran Raban Soldadu Malaysia (ATM) ti berambun nyawa ngetanka pengelantang enggau pengelikun menua.

Direktor, Opis Pekara Veteran (JHEV) ATM Pampang Nengeri Sarawak, Lt Kol Monday Juhid madahka, perintah seruran meri pengibuh sereta ngemeratka pengelantang raban veteran ATM ti nyengkaum pekara perubat, pelajar enggau ex-gratia.

“Ungkup belanja ti dibantaika dalam Bajet 2014 tu kitai nganggap nya sebengkah basa enggau temegah ati perintah ngagai raban soldadu ti berambun nyawa ngetanka menua. Perintah amat beratka veteran ATM.

“Ba penemu aku, bantu pelajar tu amat manah ungkup veteran kitai, mayuh dipeda kitai anak veteran tu betapi enggau penanggul belanja lebuh deka nampung pelajar ngagai renggat ke tinggi agi.

“Bekaul enggau bantu perubat nengah bajet nya, tu chukup engkeman laban semakin tuai umur kitai semakin nya ga begunaka bantu perubat,” ku iya lebuh dikerandau pengarang berita ba sebengkah pengerami ditu kemari, seraya madahka bantu ex-gratia nya engka bekaul enggau kes ti berat baka pemati.

Monday mansutka penemu iya lebuh ditanya bekaul enggau Bajet 2014, perintah deka ngungkupka RM48 juta enggau tuju kepengelantang 20,000 veteran ATM ti nyengkaum perubat, ex-gratia enggau pelajar anak, ti nunjukka basa enggau terima kasih ngagai veteran, ti dibantaika Menteri Besai ensanus.

Nambahka nya, Kepala Gerempung Ex-Soldadu Malaysia Pampang Tasik Biru, Jossem Daweg lebuh dikerandau mega sepenemu ti madahka nya sebengkah basa sereta kelai terima kasih ngagai raban veteran ATM.

Taja pia iya ngarapka penyampau ungkup belanja ti diagihka nya diteruska  sereta ditambahka ungkup pengelantang veteran ATM.

“Perintah ti meri belanja ngagai veteran ATM nunjukka (perintah) amat komited sereta beratka raban veteran lebih agi ti bisi bakal maya ngetanka menua menya.

“Kitai agi ngarapka bantu ti baka tu terus diberi sereta penyampau agih belanja ditambah jemah ila dikena mantu ngelempungka penusah veteran ke patut enggau begunaka bantu nya,” ku Jossem.

Kelimpah ari nya, veteran ATM ti bakal maya operasi kelia Mej (KM)(B) Micheal Riman Bugat enggau Kpl Anis Dinding lebuh ditanya bekaul enggau Bajet 2014 madahka diri temegah ati sereta nyukung penemu perintah ti beratka veteran ti bakal nengah bantu ex-gratia.

Seduai iya ngarapka perintah ngamat sereta meri bantu ex-gratia ti endang lama udah dianti raban veteran ATM ti bisi bakal lalu ngujungka sida bisi bepenimpang dalam pendiau.

Dulu ari nya Monday, Jossem, Micheal enggau Anis bisi ngulu Atur Pengawa Meraikan Anggota Cedera Peringkat 1 Divisyen nyerumba Nyambut Hari ATM Ke-80 ti diatur ba Dewan Bukavu, Kem Penrissen ditu kemari.