KUCHING: Right Revd Dato Sri Bishop John Leong Chee Yun (gambar) ke ninggalka dunya kena 18 Okt ba rumah iya empu beumur 88 taun, udah sekali ayan ba dada surat berita “Datuk bandar ukai rasmi Miri”.
Kelimpah ari ti mela dalam pengawa Gereja Anglikan, Leong chakah ba mela komuniti dalam mayuh bengkah tuduh tanggungpengawa, nyengkaum nyadi kaban komiti, tukang wang, chairman, presiden tauka pemungkal urung 40 gerempung mungkur lumba engga main, pelajar enggau gerempung pengasih di Miri.
Dalam ti meri kelala ke pengawa ke udah digaga iya ngagai mensia mayuh, iya diberi midul Bentara Bintang Sarawak (BBS) dalam taun 1970, Ahli Bintang Sarawak (ABS) dalam taun 1980 enggau Panglima Negara Bintang Sarawak (PNBS) dalam taun 1987, nundaku gerija iya nengah penerang media bedau lama ke udah.
“Dalam peneleba ba pengidup iya, betaun-aun iya meri servis sama nya ngagai Gerija tauka mensia mayuh, lalu iya semampai bekunda deka nyapai pemujur dalam servis iya ngagai Gerija enggau mensia mayuh aruh nyadika peransang ngagai semua kitai. Ba peninggal iya, jaku St. Paul dalam 2 Timothy 4:7 “Aku udah enggau naka ulih belaban dalam lumba, aku udah belanda datai ke ujung, aku udah ngintu pengarap” endang amat bendar dipeda dalam pengidup iya,” ku gerija.
Cherita ngenang pengidup iya baka tu. Leong ada di Kuching kena 23 Mei 1925. Apai iya bisi muka dagang bejait ba Lorong Carpenter parai maya John umur 8 taun ngujungka sida sebilik angkat mindah ngagai Miri, ke alai iya keterubah ngindik bangku sekula taja pan betapi enggau mayuh pemar.
Maya umur 13, iya nampung sekula iya di Kuching lalu diau ba rumah buding di St. Joseph’s Secondary School. Pelajar sekula iya tejanggal dalam taun 1942 setegal penatai Jipun. Pulai baru ngagai Miri, iya belajar jaku Jipun udah nya diambi Jipun gawa nyadi pemesai mekuh passport sereta juru penyalin jaku, sebengkah pengawa ke alai iya mantu mayuh orang maya timpuh Jipun.
Lepas perang, iya gawa enda lama nyadi penyalin jaku ungkup soldadu Australia gawa nyadi kerani enggau Shell di Seria, Brunei. Setegal ke meras gawa iya jampat niki pangkat ari kerani ngagai akautan besai dalam timpuh semina 11 taun.
Udah nya dalam taun 1960, iya ditiki pangkat nyadi ketuai begian akauntan Sarawak Shell udah nya niki ngagai Sapit Kepala Akauntan sebedau pinchin gawa kena 23 Mei 1980. Iya diambi Shell gawa baru naka taun 1985. Di Brunei iya ngayanka diri empu nya seiku orang ke landik dalam pelanda bepagar, pelanda jauh, nyemerai enggau pemain badminton. Urung 10 taun sampai ke taun 1962, iya nyadi champian Borneo dalam pingpong.
Pengudah pinchin gawa ari Shell, iya meri awak iya mayuh agi ngagai pengawa gerija, ke alai iya mela nyadi Lay Reader di parish Seria/Kuala Belait ari 1950 nyentuk ke 1959 lalu di Miri enggau Lutong ari 1960 ngagai 1974. Iya diambi nyadi Sub-deakon dalam bulan October 1974 lalu Deacon dalam bulan March 1975. Udah dichiri nyadi paderi bulan 14 Dis 1975, iya mela nyadi paderi non-stipendiari ba Gereja St. Columba’, Miri, lalu nyadi Vikar dia April 1984.
Pengudah Bishop Datuk Basil Temenggong ninggalka dunya, Leong (Father maya nya) dipaduka ngambi penuduk iya. Iya dichiri nyadi Bishop bulan Mei 17 1985 lalu dichiri Bishop ke-11 Diocese Kuching (mungkur Sarawak enggau Brunei Darussalam) dalam 19 Mei 1985 ba St. Thomas’ Cathedral, Kuching.
Maya megai episkopasi dalam 10 taun tiga bulan, Bishop John Leong enggau naka ulih nambahka pemayuh clergy (paderi enggau deakon) ari 29 ngagai 75; ngambi sereta netapka urung 4,500 iku kaban baru gerija genap taun nyapai penyampau 45,000 dalam 10 taun; negapka belanja gerija; semampai begagaka rumah baru lalu nukar keresa rumah kayu ngagai semin; ngemeratka latih teologi enggau pemansang pengarap clergy enggau kaban gerija lalu nekanka pemanah kaul enggau Perintah Nengeri. Parish baru ditumbuhka, baka St. Philip’s Lubok Antu, St. Francis’ Kota Samarahan enggau St. Christopher’s Debak.
Penyampau 13 buah gerija enggau mayuh bengkah chapel digaga tauka diaduka baru, maya iya gawa nyadi Bishop. Mega dibaruh pegai iya pemantu Bishop peranak nengeri empu iya nya Made Katib dichiri dalam bulan Februari 1992 lalu paderi menua tasik ke penudi iya pulai ngagai menua sida empu dalam bulan March 1992.
Iya mega udu bekempit enggau kaban ketuai gerempung Gereja-Gereja Sarawak lalu udah bekunda dalam ngulihka tanah ungkup Pusat Ekumenikal ba Jalai Stampin, Kuching. Kelimpah nya iya mega bisi enggau dalam pengawa numbuhka Provinsi Asia Tenggara. Iya pinchin nyadi Bishop Diocese Kuching kena 15 Ogos 1995.