Tuesday, August 16

SDNU Song ngelempungka tating penusah Rumah Japok

0

KAPIT: Kena bejalaika tanggungpengawa rama, seraban ari Gerempung Bansa Dayak Sarawak (SDNU) pampang Song udah nyuaka bantu barang pemakai enggau sekeda barang bukai ngagai peranak Rumah Japok, Sungai Musah ke dituntung penusah angus empai lama ke udah.

Bantu nya udah disuaka Sekretari SDNU, Johnny Jugah ngagai Tuai Rumah Japok ngarika sida serumah. Ku Johnny, bantu ke diberi nya kena nyaup ngelempungka tating pengidup sida. Barang pemakai ke bisi disuaka iya nya baka beras, gula, kupi enggau sabun.

Rumah Japok ke panjai 20 pintu ti digaga ngena semin nya udah dituntung penusah angus kena 11 Oktober pukul 8:15 malam.

Sekeda orang enggau gerempung ke udah nyuaka bantu ngagai sida nya baka Kelab Lions Song, Anak Bulan Mirah Malaysia Kapit, Opis Pengintu Pengelantang Pendiau, ADUN Katibas, Datuk Ambrose Blikau ke meri RM10,000 enggau Sapit Menteri Pemansang Menua Pesisir enggau Pelilih Menua Malaysia, Datuk Alexander Nanta Linggi ke meri bantu ngenyit  RM20,000 disempulang enggau 10 kilogram paku, tukul, geraji, tep penyukat, duku enggau kapak ngambika bisi dikena 20 buah ruang bilik nya ngaga dampa endur ngenduh sentara. Kelimpah ari nya, iya mega bisi meri 2 chinso , 5 buah kerita surung enggau sekup.

Lebuh ke ngabas sida ke dituntung penusah nya, iya mega nyuaka bantu ari Sapit Kepala Menteri, Datuk Patinggi Tan Sri (Dr) Alfred Jabu Anak Numpang ke mega Menteri Betanam Betupi Moden sereta Menteri Pemansang Menua Pesisir, RM1,000 enggau pemeri ari Menteri Muda Perengkaguna Mensia Mayuh, Datuk Dr. Stephen Rundi Utom, RM500.