KUCHING: Sepenyampau 4.3 juta rayat menua pesisir di serata Malaysia teulihka pemaik ari atur pemansang infrastruktur dalam timpuh 3 taun, pengudah Pelin Ubah Ekonomi (ETP) dituku berengkah taun 2010.
Menteri ba Opis Menteri Besai Datuk Seri Idris Jala madah, nengah ETP, sepemanjai 3,349 jalai nyambung kandang menua pesisir udah digaga lalu mulaika pemaik ngagai 2.2 juta rayat.
Kelimpah ari nya, Idris mega madah 287,148 rumah rayat menua pesisir udah disikap ngena bekal ai beresi ti nguntungka 1.4 juta iku rayat.
“Ba pengawa nyendia bekal lekterik, sepenyampau 95,300 rumah rayat menua pesisir udah disikap ngena perengka nya ti nguntungka 480,000 iku rayat. Perintah mega udah ngaga 50,041 buah rumah ungkup rayat ti seranta lalu nya udah diasai 250,000 iku rayat.
“Tu meh entara sekeda bukti pemujur ti udah dipejalaika perintah pengudah ETP dituku 3 taun ke udah,” ku iya.
Iya mansutka penerang tu ba pengawa bejadi The Commonwealth Association For Public Administration And Management (CAPAM) Regional Forum 2013 ditu, kemari.
Ba kaul ke sama, Idris netapka ETP udah mandangka asil ti chukup manah ke alai Penatai Pemisi Perintah ba taun 2011 enggau 2012 udah nyapai rikut ti enda kala ditempa Malaysia ngelamatu, 2011 ngerikut RM185 biliun lalu ba taun 2012 RM207 biliun.
Kelimpah ari nya, iya mega madah tikas Pemansang Pemeranak Puku Peribit (PIG) ba taun 2012 udah manggai 22 persin iya nya tiga kali lipat ari penyampau 6.7 persin ti ditempa dalam timpuh 10 taun (2000-2010).
Ba taun 2011 PIG manggai ba tikas 12.2 persin, tandu iya.
Nambah bukti pemujur ETP, Idris madah pengawa perintah ti deka ngurangka defisit fisikal diperati deka dijapai enggau mudah.
“Ba taun 2009, defisit fisikal ba tikas 6.6 persin lalu ba taun 2012 udah dikurang ngagai 4.5 persin. Kitai nagit nyapai tikas 4 persin ba taun tu.
“Bepelasarka gaya ke dipeda diatu, tagit netapka defisit fisikal ba tikas 3 persin ba taun 2015 lalu 0 persin mudah dijapai. Malaysia pan deka nyapai tikas menua mansang ba taun 2018 iya nya dulu dua taun ari perambu.
“Nitihka perambu asal, kitai nagit nyapai US$15,000 Gross National Index (GNI) ba taun 2020, tang ari gaya ke dipeda diatu, tagit nya deka dijapai ba taun 2018,” ku iya seraya madah dalam timpuh 3 taun (2010-2013) GNI niki 49 persin.