Ubah dunya patut nyadika peransang pemujur nembiak sekula, ku Abg Jo

0

NGEMUJURKA DIRI SERAYA BERATIKA PEMANSANG GLOBAL: Abang Johari nyuaka gelar ‘Ibnu Khaldun’ ngagai Mohamad Hafizi Mohamad Hairy Unggang ari Kapit lalu sama dikemataka Salbiah (dua kanan) enggau Hasnizam (kiba).

KUCHING: Pemansang nembiak ke agi besekula kemaya hari tu nadai chara bukai deka ngemujurka diri tang beratika ekonomi dunya ke majak mansang ke ngujungka lanskap dunya pan berubah.

Menteri Pengawa Dagang Temuai ti mega  Menteri Pengawa Rumah, Datuk Amar Abang Johari Tun Openg madah ekonomi menua tu aja, pan berubah nitihka singkang dunya, ari ekonomi ke bepelasarka pengawa betanam betupi ngagai ekonomi bepelasarka pemisi sereta tegap deka ngangkatka diri nyadi menua  industri.

“Tu reti, jemah ila, kita bepanggai ba pengelandik kitai mutarka sereta ngangkatka pemisi kitai di menua tu, kelebih agi di menua Sarawak.

“Enti menya, nyangka kitai ngarapka ekonomi chara lama aja, tang diatu enda ulih agi bansa nya laban kitai pan deka besemekih enggau menua bukai,” ku iya.

Iya madah baka tu lebuh bejaku ba atur pengawa ‘Majlis Graduasi 2013’ SM Sains Kuching, di Jalai Matang/Batu Kawa ditu, alai urung 200 nembiak Pom Lima sekula nya nerima setipikit sida iya deka ngabiska pom lima sida iya enda lama agi sepengudah abis peresa SPM tu ila.

Iya madah, lanskap dunya ke mayuh udah berubah diatu ngemeratka pemisi eko-sistem ke dikembuan kitai enggau rampa menua ngelingi kitai beguna endar ba menua tu laban kitai beratika deka ngelatih, ngajar mayuh agi modal mensia ke deka ngemenuhka tanggung pengawa nyadi menua industri jemh ila.

“Modal mensia mesti dikemutar nitihka lanskap ke berubah, ukai semina bepanggai ba menua kitai aja tang udah berubah mungkur ke serata dunya…Nya ke dikumbai kitai globalisasi,” ku iya.

Nya alai, ku Abang Johari, chara kita enda ulih ngena chara lama kebuah pemerat nembiak sekula diatu patut beratika adat global ke nyadi palan alai sida iya bejalaika tanggung pengawa nya.

“Maya aku agi besekula kelia, kami semina bepanggai ba utai ke nyadi dalam menua tu sereta semina ngarapka pakar dalam menua aja, tang diatu nembiak diatu ukai agi di empu ulih menua tu aja tang nyadi anak dunya ketegal pemansang teknologi kemaya hari tu,” ku iya.

Bechuntoka sebuah palan teknologi ke pengabis maju dalam dunya, ‘Silicon Valley’ di US, chara seiku professor, Professor Salman Khan ngajar nembiak  ukai agi baka diatu tang ngajar nengah ‘youtube’, alai 10 juta nembiak belajar nengah arung tu, ngulihka penemu ari sebuah palan teknologi tebilang di dunya tu.

“Semua utai ke dipelajar kitai ulih digiga nengah ‘online’. Enti utai ke diajar di sekula enda ditemu kitai, belajar nengah ‘online’ ke muntang digiga kemaya hari tu,” ku iya lalu nambah nembiak muntang teulihka pelajar laban pemisi teknologi.

Kelimpah ari nya mega, Abang Johari madah, menua Sarawak manggai taun 2030 tu ila, deka ngangkatka diri nyadi sebuah menua industri.

Berindik ari nya, ku iya baka sekula sains, nembiak sida iya entara orang ke diguna ngisi peluang pengawa ke bisi jemah ila kelebih agi nembiak ke udah dilatih pengelandik sida iya dalam pekara sains enggau teknologi.

“Sarawak deka nyadi menua ke pengabis maju dalam Malaysia, manggai taun 2030 tu ila. Reti nya, anak-anak kitai patut landik nitihka singkang ubah dalam ekonomi, kebuah kitai ngemeratka pelajar Sains,” ku iya.

Manggai taun 2030, Sarawak deka begunaka urung 350,000 orang landik ke bisi pakar dalam sekeda pengawa.

“Pemayuh nya dipeda besai endar tang kitai beratika peluang ke anak kitai, kelebih agi sida ke besekula di sekula sains.

“Kitai mega begunaka orag gawa ke ulih nyukung piak petengan ke diperambu manggai 1.6 juta (2030). Ba sentang tu, nyangka kitai enda begunaka pengelandik nya datai arfi menua tu tang ngambi orang ari menua luar mantu kitai,” ku iya.

Baka sekula teknikal enggau sains ku Abang Johari, nyadi pemisi ngelatih nembiak ngisi pengawa puang nya ila sereta nyaut pemansang ekonomi ke benung nyadi diatu.

Ba atur pengawa ti digaga di sekula nya, urung 116 iku nembiak dalam Pom Lima nerima setipikit sida iya, nyadi nembiak sekula ke deka ngambi peresa SPM, lalu udah nya nyambung pelajar sida iya ngagai IPTA tauka IPTS, kelimpah meri gelar ngagai sekeda nembiak Pom Lima ke diberi gelar penerima gelar sabjek ke pengabis manah, meri gelar ‘Anugerah Pengetua’ ‘Anugerah Ibnu Sina’ (dimenang ulih Muhamad Haziq Sudin) enggau ‘Ibnu Khaldun’ (dimenang ulih Mohamad Hafizi Mohamad Hairy Unggang).

Abang Johari mega meri bantu RM20,000 ngagai sekula nya ke ulih dikena sekula nya ngaga pengawa pemansang.

Sama bisi ngulu atur pengawa nya kemari, Kepala Pengajar SM Sains Kuching, Salbiah Seman, enggau YDP Serakup Apai Indai enggau Pengajar SM Sains Kuching, Dr Hasnizam Abdul Wahid.