KUCHING: Nembiak rebak baru patut ngetan enggau ngemeratka ulah ti ulih nerima penemu orang bukai, pemaik enggau pengelantang sereta penegap ti dikemeranka rayat enggau menua tu, ngambika sama diasaika rebak dudi.
Menteri Muda Pemansang Nembiak, Datuk Abdul Karim Rahman Hamzah madah, tu laban semua nya ulih ngemujurka perintah bejalaika pemansang di nengeri tu.
Ulah ti ulih nerima penemu orang bukai ku iya patut ulih dikemeran sereta dikemeratka rebak baru berindik ari menua kelebih agi Sarawak ti diuan mayuh pupu bansa, adat enggau main asal sereta mayuh jalai pengarap.
Nembiak rebak baru enda patut ngambi mudah pasal pemaik enggau pengelantang sereta penyerakup ti udah lama dikemeranka, ku iya.
“Kita (rebak baru) enda tau enda bebendar ngetan sereta ngenukuka ulah ulih nerima penemu orang bukai, pemaik enggau pengelantang sereta penegap, ngambika ulih meri pengelikun, pengelantang sereta sama ulih diasaika rebak dudi.
“Laban ketegal ulah ti ulih nerima penemu orang bukai, ketuai ti engekeman, pemaik enggau pengelantang, penyerakup enggau penegap, kitai (perintah) ulih ngemansangka nengeri tu.
“Ari tu mayuh ubah pemansang ti udah nyadi di menua tu nyengkaum di Kuching, Bintulu, Betong, Miri enggau Kota Samarahan enggau kandang menua bukai,” ku iya seraya muji peninggi ulah ke ulih nerima penemu orang bukai ti dikemeranka rayat nengeri tu.
Karim ti nyadi Menteri Muda Pengawa Berumah mansutka pekara nya lebuh bejadika Forum Belia, Soul2Soul 2.0: “Tweeting-Up” ti berambaika leka jaku ‘Perpaduan Sosial melalui Media Sosial’ ke diatur begulai entara Angkatan Zaman Mansang (AZAM) Sarawak enggau Pusat Penerangan Islam Sarawak (IIC) di Pusat Ekumenikal Kristian ditu kemari.
Ngenang forum nya, iya ngarapka raban nembiak ti enda ngira pupu bansa enggau jalai pengarap ulih berandau sereta bekunsi penemu enggau peneleba bekaul enggau isu ti nyadi kemayahari tu.
Penanggul ari salah guna media sosial patut ulih diperati sereta dikeibuhka orang mayuh lebih agi raban nembiak.
Chairman, Komiti Pemansang Nembiak AZAM 2012/2014, Mohd Ariff Irwani Azahari dalam jaku pengelalu madahka forum nya meri awak ngagai raban nembiak menua tu berandauka pasal isu ke bisi nyadi.
Nengah forum ku iya, raban nembiak ulih bekunsi sereta nempa pengibuh pasal ulah, etika enggau jalai pengarap ti dikemeran dalam pengidup.
“Tuju forum tu diatur ngambika ulih nyadi pelasar endur raban nembiak berandau sereta berunding enggau diri sama diri sereta enggau bala panel ti profesyenal pasal isu nguna media sosial,” ku iya.
Entara panel forum nya nyengkaum Datin Paduka Marina Mahathir iya seiku Journalis, Kolumnis Suratberita; Ketuai Pemesai Eksekutif Yayasan 1Malaysia Rafly Nann; Consultan, Bro. Shah Concultancy & Services, Kuala Lumpur Shah Kirit Kakulal Govindji, Martinian Lee ari St Peter College enggau Dekan Fakulti Sains & Maklumat Teknologi Komputer, Universiti Malaysia Sarawak, Prof Narayan Kulathuramaiyer.
Lebih 200 iku raban nembiak ngulu forum nya ti nyengkaum ari Institut Pendidikan Guru Malaysia, Institut Pelajar Tinggi, gerempung jalai pengarap, gerempung etnik, gerempung raban nembiak, gerempung ukai dikuasa perintah (NGO) enggau kebukai.