SMK Saribas champian Mangkuk Direktor Opis Pelajar S’wak 2013

0

BETONG: Tim main bol baruh 16 taun Sekula Sekondari (SMK) Saribas mandangka sida enda nangika sebarang tim main bol ba Bagi menua Betong, lebuh sida nyadi champian ba pekit 7 Sepiak Mangkuk Direktor Opis Pelajar Sarawak 2013, udah bekau ngalahka tim ari SMK Beladin 3-0 ba final ke diatur ba Lumba enggau Main Betong ditu lemai ensanus.

Tim ari SMK Saratok enggau SMK Pusa sama ba lumur tiga, udah bekau sama alah ba tikas semi final  ba pekit nya.

Dulu ari nya ba final baruh 14 taun, SMK Saint Augustine Betong udah nyadi champian sepengudah ngalahka SMK Saratok 2-0, dalam pekit ke sama ba main ke diatur di padang SMK Saint Augustine, ke mega nyadi padang kedua pekit nya.

Tim ari SMK Beladin enggau SMK Saribas ba tangga ketiga sepengudah alah ba tikas semi final.

Pekit nya sebengkah ari aktiviti ke diperambu Opis Pelajar Pelilih Mit Betong kena nyikap bala nembiak ngembika landik bemain, kelimpah ari ngemataka pengelandik nembiak sekula sekondari ari Bagi menua Betong ke landik bemain bol.

Bisi lapan bengkah tim sekula sekondari ngambi bagi ba pekit nya baka SMK Saratok, SMK Beladin, SMK Pusa, SMK Saribas, SMK Spaoh, SMK Datuk Patinggi Kedit, SMK Saint Augustine enggau SMK Ulu Layar.

Berebak enggau nya, Direktor Opis Pelajar Menua Sarawak, Datu Abdillah Adam sama bela enggau ngemataka pekit final nya seraya bejadi lalu nyuaka perais ngagai pemenang.