Laila, seiku bansa Melayu ngembuan pengelandik ngaga ngepan bansa Iban

0

KEREBAN INDU: Laila mandangka kain sidan ke dijual iya.

ALUMINIUM: Sekeda ari kereban ngepan indu bansa Iban ke digaga ari aluminium baka buah pauh enggau simpai ke bisi dijual iya.

PENATAI PEMISI: Kelimpah ari sugu tinggi, Laila mega bisi nyual ngepan bansa Iban ke bukai baka baju burung.

ASIL PENGELANDIK JARI: Sugu tinggi ke digaga sereta dijual Laila semak makit bejualka asil kampung di pasar Lubok Antu.

SRI AMAN: Bansa Iban sebengkah ari bansa asal ke tebal nguan sereta diau di serata menua Sarawak. Taja pan bansa Iban dipeda baka ke pambar nguan batang ai diri sereta kandang menua, tang sida tetap ngembuan adat asal, main enggau ngepan ke sebaka ti lalu nyadi kelai bansa nyentuk ke sehari tu.

Diatu, semua pekara ti nyadi kelai sereta ngemegahka bansa Iban tetap diintu enggau siru sekalika nya ari raban gerempung Ukai Dikuasa Perintah (NGO), ijnsi perintah, opis perintah enggau komuniti ba sesebengkah kandang menua tauka rumah panjai.

Munyi ku leka jaku sempama Iban, ‘dikelala buah ari langgu dikelala bansa ari jaku’. Baka nya meh ke nyadi di pasar mit Lubok Antu ti tebal diuan raban bansa Iban kenyau ari kelia.

Taja pia, pasar Lubok Antu sebaka enggau sekeda pasar mit bukai di serata menua Sarawak ti tebal diuan bansa Iban, ke alai bansa bukai ke udah lama diau mendam sereta ngembuan jalai pengidup bekempit sereta manah kaul enggau bansa Iban di menua nya, chukup landik bejaku sereta nemu pasal adat basa, main enggau ngepan bansa Iban.

Laila, seiku bansa Melayu ke asal ari Kampung Melayu Lubok Antu, mega udah lama ngemeranka dagang bejualka ngepan bansa Iban lebih agi ngepan orang indu, chukup landik ngaga seiti ari kereban ngepan indu bansa Iban ke dikumbai sugu tinggi.

Sugu tinggi tu sebengkah ari kereban ngepan  indu bansa Iban ke enda tau enda dikena lebuh sida nyarungka ngepan maya bisi pengerami besai, nyambut YB, menteri,  tauka masuk pekit kumang.

Ku Laila, ukai nyamai deka ngaga sugu tinggi nya. Taja pan kelia, asal sugu tinggi nya endang digaga ari pirak, tang diatu ketegal ungkus besai ngulihka pirak, iya ngaga sugu tinggi nya ari aluminium enggau plastik.

Iya udah ngemeranka pengawa ngaga sugu tinggi nya kenyau ari taun 2006, endang bisi chuan kena ngaga sugu tinggi enggau bungai ke dikena ngias sugu tinggi nya. Chuan nya mega bebida nitihka gaya sugu tinggi ke deka diasilka iya. Ari gaya chuan ke dikena ngaga sugu tinggi nya, deka meri bida ba rega.

Lebuh ditanya, berapa iti ulih digaga iya dalam sehari? Laila madahka iya ulih ngaga urung 3 nyentuk ke 4 iti sehari, nya pan enti nadai kiruh enggau pengawa bukai. Taja pia, bungai ke dikena ngias sugu tinggi nya semina ulih digaga iya urung 20 iti dalam sehari.

Seiti sugu tinggi ke udah tembu digaga dijual Laila enggau rega RM 35 nyentuk ke RM150, nitihka gaya, pemesai enggau pemanah kualiti sugu tinggi ti digaga iya. Reti iya, pemar rega nya bepanggai ba pemesai, pemayuh bungai dikena ngias enggau pemanah kualiti sugu tinggi nya.

Laban Laila tu endang orang ke ngemeranka pengawa bejualka ngepan asal bansa Iban, iya ukai semina nyual sereta ngaga sugu tinggi aja, tang mega nyual kereban ngepan Iban bukai baka simpai, buah pauh, sementing indu, selampai, kain sidan, baju burung sekeda utai bukai. Kereban ngepan Iban bukai ke enda digaga iya empu, dibeli iya ari orang bukai sereta dijual nyadika penambah sugu tinggi ke digaga iya. Semua kereban ngepan Iban nya dijual iya enggau rega ke patut bepanggai ba pemesai, bansa utai ke dikena ngaga enggau kualiti.

Kelimpah ari ke dijual ba pasar Lubok Antu kelebih agi maya Hari Minggu, Laila mega bisi nyual sugu tinggi ke digaga iya ngagai endur bukai baka di Kuching, Sarikei, Pakan enggau sekeda endur bukai nitihka peminta.

Taja pan Laila tu ukai bansa Iban, tang pengawa iya ngemeranka dagang ngepan bansa sereta ngasilka sugu tinggi patut ngemegahka ati bansa Iban, laban iya ukai semina bulih penatai pemisi ari nya, tang mega nyaup bansa Iban ngetanka sebengkah ari kereban ngepan ti nyadika kelai bansa Iban nyentuk ke sehari tu.

Bansa Iban, lebih agi ke ngembuan pengelandik jari patut bechuntoka pengelandik enggau penyakah Laila ngaga sugu tinggi tauka asil pengelandik jari bukai, ke ukai semina tau nyadika penatai pemisi aja, tang nyaup ngetanka semua kereban ke dikemisi bansa Iban ngambika bisi dipeda sereta ditampung nembiak rebak ke dudi ila.

Pekara tu  mega ukai semina pulaika pemaik ba penatai pemisi aja orang ti ngasilka produk nya aja, tang ngemegahka ati laban nya sebengkah ari inisiatif dikena ngetanka kelai bansa ke majak luya besemekih enggau gaya pengidup moden ke diatu.

Kelimpah ari nya bansa Iban patut enchelakka mata meda pemujur bansa bukai ti bulih penatai pemisi bejualka kereban enggau asil pengelandik jari bansa kitai, lalu arapka pemujur Laila nya nyadika peransang bansa Iban ngaga, ngetan sereta nyual asil ke digaga sida, ngambika tikas pengidup bansa kitai seruran nyingkang mansang belama dalam semua bidang sebaka enggau bansa bukai nyengkaum ba pengawa dagang.

Barang sapa ke bisi ati deka nemu enggau silik tauka meli sugu tinggi ti diasilka Laila, tauka sekeda kereban bukai ke bekaul enggau ngepan bansa Iban, tau bejaku enggau iya empu nengah lumur telefon 013-8435659.