Pemansang industri tau bendar nyungkak penatai pemisi peranak menua pesisir: Dr Johnical Rayong

0

DIPENYADI: Dr Rayong (bediri di atas, tiga ari kiba) enggau Harden (kiba) begulai enggau pengereja pengawa ari kompeni Kuching Stone maya atur pengawa nya ditu.

ENGKILILI: Rayat ba kandang Kunsil Nengeri (DUN) Engkilili patut nerima semua projek industri ke dipejalaika perintah tauka kompeni luar enggau ati ke gaga.

ADUN Engkilili, Dr Johnnical Rayong Ngipa madah, pengawa bejalaika projek industri nya ulih nyungkak penatai pemisi rayat ba kandang menua nya seraya nyendiaka pengawa puang ngagai sida.

“Pengawa muka kuari di Marup, Engkilili ulih nyendiaka mayuh pengawa puang ngagai semua peranak menua ditu nyengkaum ari Sri Aman enggau Lubok Antu.

“Tu mega ulih nyungkak ekonomi ba kandang menua Engkilili. Aku minta rayat begempung  enggau orang ke muka kuari tu, ngambi pulaika pemaik ngagai semua,” ku iya lebuh bejaku ba Pengerami Bejadika Kuari Bukit Balang ke diempu kompeni Kuching Stone Sdn Bhd di Marup, Engkilili.

Berebak enggau nya, Menteri Muda Pemansang Menua Pesisir, Datuk Francis Harden Hollis lebuh ke bejaku maya nya arapka rayat nguna awak gawa ba kuari nya ila.

“Tu meh peluang ngagai semua rayat lebih agi ba kandang DUN Engkilili teulihka penatai pemisi gawa ba Kuari Bukit Balang tu,” ku iya ke mega Menteri Muda Pengawa Berumah.

Kuari Bukit Balang di Marup, Engkilili deka berengkah bejalaika pengawa kandang enam bulan belabuh ari diatu, enti injin ba kuari nya tembu dipasang dia ila.

Sama bisi ngulu atur pengawa nya, Menijer Kompeni Kuching Stone, Kong, Temenggung Sii Toh Peng, Pengulu Lee Siang Hua, Ketuai Nembiak SUPP Simanggang, Patrick Michael Malajin enggau sekeda ketuai raban bansa.