UKAI MUNYI KE DIPERITA: Len Talif meri penerang ngagai pemberita pengudah bejadika Hari Integriti enggau Inovasyen Pusaka 2013 ke diatur di Wisma Sumber Alam ditu.
KUCHING: Menteri Muda Rampa Menua Datu Len Talif Salleh kemari netapka, nadai pengawa nebang kayu enggau enda beradat baka ke diriput nyadi di Melikin, Serian.
Taja pia, iya madah, sebagi ari dua kompeni ti ngereja batang ba kandang endur nya udah ditangkan ngambika ngetuka pengawa sida seraya nganti pemendar nya dikeluar Opis Kampung.
Len Talif ke mega Menteri Muda ba Opis Kepala Menteri madah, perintah nya dikeluar pengudah kompeni ke bekaul enda nitihka atur kereja (SOP) ti udah ditetap.
“Kitai udah bejalaika pansik dalam kandang sebulan ke udah lalu nadai sebarang pengawa batang ti dikereja belalai di Melikin munyi ke dituduh,” ku iya bejaku ngagai pemberita pengudah bejadika Hari Integriti enggau Inovasyen Pusaka 2013 ke diatur di Wisma Sumber Alam ditu, kemari.
Len Talif datai ngarika Menteri pengatur Pengeraja Asal enggau Rampa Menua II Datuk Amar Awang Tengah Ali Hassan.
Ketegal kompeni enda nitihka atur kereja ti ditetap, iya madah sebengkah palan tekat ai udah balat keruh kelebih agi maya hari ujan.
“Berindik ari nya, pemesai kitai udah dikerah ngeluarka perintah ngelalau kompeni nya ngetuka pengawa sida iya nyentukka pansik tembu dipejalai,’ku iya nambah.
Ngenang senentang penusah rayat kandang endur nya ti diperita udah dikeremba sereta diinsah raban gangster ke digaji kompeni, Len Talif madah :” kes nya dilempaika ngagai polis ngambika ditasat.”
Iya mega netapka nadai sebarang penyarut senentang adan tanah entara orang ke ngempu tanah NCR enggau kompeni bisi nyadi ba kandang endur nya.
“Tebal agi sebana ti dipansut orang ke ngempu tanah NCR iya nya senentang penusah bekal ai ti udah keruh, lalu ukai pengawa nebang batang,” ku iya.