ENGGI NUAN: Austin nyuaka ‘skrol’ ngagai seiku nembiak KEMAS ke tembu belajar seraya dikemataka mandal direktor KEMAS Sarawak, Joseph Unsong.
KUCHING: Nembiak sekula ari ruang bilik ke kena bungkur projek tekat ai Bengoh deka mengkang nerima pemakai ke enda bebayar ari sekula pengudah sida pindah ngagai palan pengentap baru enda lama agi.
Ko-ordinator Komiti Sekim Pengentap Baru Bengoh (BRS) Temenggung Austin Dimin madah, sida udah ngaga sempekat enggau Opis Pelajar ngambi nyendiaka pemakai, pemadu nadai sekali sehari taja pan sekula primari ukai sekula bemalam.
“Diatu anak ari ruang bilik ke ari genturung pendiau Semban, Taba Sait, Rejoi enggau Pain Bojong besekula ba dua buah sekula buding ke alai sida bisi disediaka pemakai tiga kali sehari. Enti sida pindah ngagai rumah baru ila, sekula baru nya ila ukai sekula buding laban digaga ba kandang palan pengentap baru nya.
“Sebedau tu, kami udah minta Opis Pelajar majak nyendiaka pemakai pemadu nadai sekali sehari lebih agi maya nembiak ngetu belelak, taja pan sekula nya ukai sekula bemalam. Nya ulih ngelempungka tating pengidup ruang bilik ke seranta, tambah mega anak sida bisi pemakai ke bepengerai sereta enda lapar maya belajar.
“Aku ke nyadi koordinator BRS, meri terima kasih ngagai perintah laban ke setuju enggau peminta kami,” ku iya madah ngagai media ensanus.
Austin berandau enggau pengarang berita pengudah ngulu pengerami Menteri Muda Pengerai Mensia Mayuh, Datuk Dr Jerip Susil ba mini-Konvokasyen ungkup Tadika enggau Tabika ti dipejalaika Opis Pemansang Raban Bansa (KEMAS) tikas sitak Bengoh di sebuah hotel ditu.
Nitih riput ke dikeluarka ba surat berita sebedau tu, bisi 204 ruang bilik ari sekeda genturung pendiau enda tau enda pindah ngagai palan pengentap baru ba entara Genturung Pendiau Semadang, Penrissen enggau Genturung Pendiau Skio Bau enda lama agi, ngambika tekat ai Bengoh nya ulih diisi ngena ai kena napi peminta ai di Pelilih Kuching.
Ruang bilik ke kena bungkur projek tu bisi minta sebuah sekula baru digaga ba kandang palan pengentap baru nya, ngelaban penemu asal ti deka mindahka anak sida ngagai sekeda sekula bukai.
Ku Austin, rumah sekula arau deka digaga semak opis kunteriktor Naim Holdings Berhad.
“Opis nya mega udah diubah nyadi sekula,” ku iya.
“Sekula nya mega patut dibuka maya nembiak besekula baru dalam bulan Januari taun baru. Nama baru ke deka diberi ngagai sekula nya dipelabaka SK Sekim Pengentap Baru Bengoh.”
Lebuh ke bejaku ba pengerami nya, Austin arapka bala apai indai lebih agi ba sitak Bengoh, ngemeratka pelajar sekula anak sida berengkah pelajar tumu ba sekula Tadika.
Iya mega minta apai indai suah agi berandau enggau orang ti numbuhka tadika ba genturung pendiau sida senentang chara nyungkak pemanah endur anak sida belajar.
Bisi seraban 234 iku nembiak ari 16 buah tadika KEMAS enggau 7 iku nembiak ari sebuah tabika KEMAS di Bengoh nerima setipikit sida ensanus, kelai udah nembuka pelajar ngelama 2 taun ba tadika enggau tabika.