PBTM deka ditukar nyadi PVATM pengudah dikemendarka ROS ila

0

BESAUP BEJURAI: Sekeda ari pengari ti ngulu Aum Besai Ninting Taun PBTM ke diatur di Melaka Hari Minggu tu tadi.

MELAKA: Gerempung Ex-Soldadu Malaysia (PBTM) deka diganti enggau nama Malaysian Armed Forces Veterans Association (PVATM) pengudah ubah ba pekara konstitusyen dikemendar nyerumba aum besai gerempung ke diatur Hari Minggu tu tadi.

Pekara tu entara sekeda ari ubah ti dikemendar ba aum ti digulu pengari ari semua pampang PBTM serata menua.

Ubah bukai ti bela dikemendar iya nya senentang rambai jaku logo, menira enggau lambang gerempung.

Presiden PBTM Laksamana (pinchin) Tan Sri Dato’ Setia Mohd Anwar Mohd Nor madah ubah ba nama gerempung ti dikemendar setipak enggau raban ti ba dalam gerempung ti ngarika orang veteran.

“Kitai deka meda gerempung mai leka jaku veteran ngambika mensia mayuh mudah ngelala sereta mereti leka jaku veteran.

“Sekeda orang kitai enda nemu reti veteran lalu kitai ngarapka sida berengkah meretika pekara nya diatu ke alai enda semua orang ke pinchin tau dikumbai veteran, orang pinchin polis pan enggai nyadi dikumbai kitai veteran,”ku iya.

Iya nambah, pekara tu enda nyadi isu ba menua tungaka barat ketegal sida udah lama nemua semina orang ke kala nyadi sedadu aja tau dikumbai veteran.

“Ketegal nya, PBTM ngansak raban gerempung ex-soldadu sereta kelab ke bukai mai leka jaku veteran ngambika kitai ngembuan identiti ke sama,’ku iya.

Iya ngarap pemutus nya ulih matak semua gerempung ex-soldadu enggau kelab begempung ba siti perabung ke alai semua ngembuan juluk ke sama.

Iya netapka ubah nya deka dianjung nagai Opis Pengerejister Gerempung (ROS) dalam awak ke semak tu.

“Naka ke diatu kitai bisi 64 buah gerempung ex-soldadu enggau kelab di serata menua ke alai kitai keran deka matak sida begempung ba baruh perabung ke sama ti ulih dijapai enti Akta Veteran 2012 berengkah diterit,”ku iya.

Iya nerang nengah Akta Veteran 2012, semua gerempung enggau kelab ex-soldadu deka diintu siti spisil gerempung ke dikumbai National Veterans Council (NVC).

Diatu gerempung enggau kelab direjister nengah ROS.

Ngenang senentang Aum Ninting Taun ke-88 PBTM ti baru udah tembu, Anwar madahka aum sehari nya nyadi aum ke pemadu manah udah diadu ngelamatu.