Seminar ke diatur Socso Kapit nerima puji ari Ugak

1

MERETI AGI: Ugak (tengah) nyuaka setipikit penembu ngulu seminar ngagai seiku penyereta ke diatur Socso di Rumah Gindal, Pulau Sibau, Sungai Mujong Kapit ujung munggu tu tadi.

Pengawa nya engkeman, berindik ari pemayuh peranak menua dia gawa ba kompeni batang

KUCHING: Kaban Parlimen Ulu Rajang Wilson Ugak Kumbong muji penyakah Gerempung Nyaga Pengelikun Orang Gawa (Socso) Pampang Kapit ke ngatur seminar, Ketuai Begulai enggau Rayat di Rumah Gindal, Pulau Sibau, Sungai Mujong Kapit ujung minggu nyin tadi.

Ku Ugak, iya berasai gaga ati enggau seminar nya laban tebal agi mensia ari sitak nya gawa ba kompeni batang, ke mudah betapi enggau penusah lebuh bejalaika pengawa sida.

“Nengah pemereti sereta penalam penemu senentang batang pengawa ti dipejalaika Socso, orang ke mayar nya deka ngelala sereta nemu ungkup diri,” ku Ugak.

Lebuh ti bejalaika pengawa nyadi Kaban Parlimen ba sitak Ulu Rajang, Ugak bebendar nguji mantaika penanggul, sebana enggau pemar ke ditapi rayat ba sitak nya ba aum parlimen tu tadi.

Ugak mega bisi mantaika pengurang ke nyadi ba sekula di ulu entigis, ti patut dikemeratka enggau lengkas sereta begunaka mayuh belanja.

Iya mega madahka, kandang menua nya mengkang begunaka mayuh agi jalai alun baka ke jalai alun ke diperambu deka digaga ari Rh Juntan nuju ke Rh Bengau (13 km), Nanga Mujong lalu ke Nanga Gaat (30 km), Nanga Mujong nyentuk ke Nanga Tiau (60km), pasar Belaga ke patut digaga nengah Jiwa Murni, ari baruh stratergi Gelombang Biru Perintah, ngambika mayuh agi jalai ulih nyambung rumah panjai di Ulu Rajang.

Senentang pekara pengerai, Ugak mega minta perengkaguna ba Sepital di Kapit enggau Belaga ditambah nyengkaum katil enggau pengereja pengawa dikena napi peminta ke majak mayuh di Sepital Kapit enggau Belaga.

“Kurang lutur sereta enda chukup lutur pakar pekara ke balat amat nyadi di Sepital Kapit enggau Belaga,” ku Ugak

Iya arapka Opis Menteri Pengerai amat ngemeratka peminta tu, ngambi ngenataika pemaik ngagai rayat di Kapit enggau Ulu Rajang.

Ugak mega bisi mantaika penanggul ke nyadi ba palan pemeresi ai Sg Asap, perengkaguna lumba enggau main ba pasar Kapit enggau Belaga, bungkur internet ke enda manah, bungkur perengka penyambung ke enda manah, mayuh agi sabsidi ungkup menua pesisir ba pengawa betanam, perengkaguna ungkup rayat di menua pesisir sereta mayuh agi projek pemansang ari baruh pegai perintah Barisan Nasional (BN).

Iya mega ngelalau rayat ngintu utai ke udah bisi diatu laban sida agi untung agi enti dibanding enggau sekeda menua di dunya tu.

“Jaga memanah utai ke udah dikemisika kitai enggau utai ke udah dipejalaika perintah BN ngagai kitai,” ku Ugak.

“Ngambika kitai semua nemu, atur Socso tu tau dikesema baka kompeni insurans, taja pan ke bendar sida bejalaika tanggungpengawa ke besai agi, dikena ngintu pengelantang pendiau enggau pemar ke ditapi pengereja pengawa pengawa lebuh ke dituntung penusah.

Nengah tinjau ti dipejalaika Socso, agi mayuh pengereja pengawa enda nemu ungkup diri ti disediaka Socso. Nya alai, tuju seminar tu diatur kena ngiri penemu sereta nerangka ungkup sida enti sema dituntung penusah ba endur gawa.

Ijinsi bukai ke bsi ngambi bagi ba seminar nya, iya nya National Institute for Occupational Safety and Health (NIOSH), Kunsil Pesaka Asal enggau Rampa Menua (NREB), Opis Pengereja Pengawa Pampang Kapit enggau Agro Bank Kapit.