PEMADU NYULUT DI MALAYSIA: Mong anak Rengan (kanan) nerima Gelar Penyulut IPC – Pekebun Lada Pemadu Nyulut 2012 ari Uggah seraya dikemata (ari kiba) Nurmala enggau Mong.
Dikena nyungkak penatai pemisi pekebun mit di menua tu, RM29.35 juta belanja udah dikemendar
KUCHING: Perintah besai ngarapka rega lada majak manah manggai ba taun 2014 ke alai agih belanja RM29.35 juta udah dikemendar ungkup program pemansang industri nya.
Menteri Bekebun Bedandang Besai enggau Komoditi Datuk Amar Douglas Uggah Embas madah, atur nya deka nentuka 67,000 pekebun mit lada di serata menua teulihka penatai pemisi ke tinggi.
“Rega lada maya ke diatu mengkang manah, aku arapka rega tu majak niki jemah lalu mangggai ba tikas ti tau meri penguntung ngagai pekebun mit lada.
“Industri tu udah mantu ngurangka penyeranta di menua kitai ke alai bala pekebun udah teulihka penatai pemisi ke tinggi. Berindik ari nya aku ngarap raban orang ke ba industri tu ulih nyaup nentuka rega lada mengkang manah,” ku iya.
Iya mansutka jaku tu ba siti aum pengarang berita pengudah bejadika The 41st Session & Meeting of International Pepper Community (IPC) ti diatur ba sebengkah hotel ditu, kemari.
Iya mega ngansak raban dalam IPC berundingka chara pemadu engkeman ti tau dikena ngintu pemanah tikas rega lada ngambika enda nurun lalu enda mega kelalu tinggi.
“Aku pechaya, mayuh atur ulih disusun raban ke bejuraika pengawa nya ditu ngambika penyampau lada ti dipansut tiap menua ulih diintu kelimpah kitai ti deka nentuka rega mengkang manah.
“Enti rega kelalu tinggi, penyampau lada ke dikeluar semua menua ke nanam lada disadang nambah lalu tau bendar ngujungka rega lada nurun enggau jampat,’ku iya.
Kelimpah ari nya, Uggah ke mega Kaban Parlimen Betong madah, penyampau tanah endur nanam lada ba serata Malaysia deka ditambah ngagai 20,000 hektar manggai ba taun 2020 ke alai diatu semina 14,000 hektar aja udah ditanamka lada.
Ku iya, 95 persin kebun lada ditumbuhka ba Sarawak maya ke diatu lalu kitai merambu mayuh agi tanah di Semenanjung Malaysia enggau Sabah ditanam enggau lada jemah.
Dulu agi ari nya, ba jaku bejadi program kemari, Uggah madah, penyampau asil lada ba serata dunya dalam taun 2012 udah nambah 2 persin iya nya manggai 324,090 tan enti dibandingka semina 317,750 tan ba taun 2011.
Ba pengerami nya mega, seiku pekebun lada ari Julau, Mong anak Rengan nerima Anugerah IPC – Pekebun Lada Pemadu Nyulut 2012.
Sepenyampau 245 penyereta ari 20 buah menua datai ngulu aum ti diatur empat hari berunggu berengkah kemari nyentuk 14 November tu.
Bela bisi ngulu atur pengawa nya, Menteri Muda Betanam Betupi Datuk Mong Dagang, Chairperson IPC 2012/2013 Datin Paduka Nurmala Abdul Rahim, Chairman MPB Dato Henry Sum Agong sereta orang bukai.