Lima rang undang-undang dibantai ba aum DUN, 18-27 November

0

KUCHING: Lima rang undang-undang deka dibantai ba aum kedua ungkup sesi ketiga penggal ke-17 Dewan Undangan Negeri (DUN) berengkah sehari tu, 18 ngagai 27 November 2013.

Speaker DUN, Datuk Amar Mohd Asfia Awang Nassar madah lima rang undang-undang iya nya Rang Undang-Undang Pembekalan Tambahan (2013), Rang Undang-Undang Perbekalan (2014), Rang Undang-Undang Pembangunan Perumahan (Kontrol dan Perlesenan) 2013, Pindaan Rang Undang-Undang Perbadanan Pembangunan Perumahan 2013 enggau Pindaan Rang Undang-Undang Pihak Berkuasa Tempatan 2013.

“Semua rang undang-undang deka dibacha keterubah iya kenaka 18 November. Semina  Pindaan Rang Undang-Undang Pihak Berkuasa Tempatan 2013 deka dibacha kedua kali lalu bajet deka dibacha muakka lemai jam 2.30 petang.

“Kenaka Hari dua (19 November), atur kelikuh nya  deka bejuraika Rang Undang-Undang Pembangunan Perumahan (Kontrol dan Perlesenan) 2013 enggau Pindaan Rang Undang-Undang Perbadanan Pembangunan Perumahan 2013.

“Rang Undang-Undang Perbekalana Tambahan (2013) deka dibantai kenaka 20 November lalu deka ditangkanka enggau sesi tanya saut pengelama sejam berengkah Hari Dua (19 November) ngagai 22 November,”ku iya.

Asfia mansutka jaku nya ba aum pengarang berita pengudah aum Pra-DUN ke diulu Kepala Menteri Pehin Sri Abdul Taib Mahmud ke mega Chairman Barisan Nasional (BN) di Indu Opis PBB ditu, kemari.

Asfia nandu, Rang Undang-Undang Perbekalan Tambahan (2013) deka dibantai Menteri Pekara Wang II Dato Sri Wong Soon Koh lalu Rang Undang-Undang Perbekalan (2013) deka dibantai Kepala Mentari ke mega Menteri Wang..

Menteri Perumahan Datuk Amar Abang Johari Tun Abang Openg deka mantaika Rang Undang-Undang Pembangunan Perumahan (Kontrol dan Perlesenan) 2013 enggau  Pindaan Rang Undang-Undang Perbadanan Pembangunan Perumahan 2013.

Wong ke mega Menteri Kunsil Kandang Menua mega deka mantaika Pindaan Rang Undang-Undang Pihak Berkuasa Tempatan 2013.

Ba kaul ke sama, penyampau 335 tanya lisan enggau ditulis bisi diterima ba aum serak tu ke alai jaku balas ari tiap opis menteri deka diadu kenaka 25 ngagai 27 November.