Iya ke nyukung penemu Masing, minta pekara nya diputar enggau jampat enggaika ngeruga pemansang kelimpah ari pengawa bepilih ti deka diatur ila
KAPIT: Ketuai raban bansa Iban di Kapit, Temenggung Datuk Kenneth Kanyan kena Hari Minggu nyin tadi madahka diri nyukung Menteri Kanan ke mega Menteri Pemansang Tanah Sarawak, Tan Sri Datuk Amar Dr. James Jemut Masing ke minta perintah nyerenih baru penuduk Sarawak dalam menua Malaysia.
Dalam surat berita The Borneo Post ti dikeluarka kena Hari Enam,16 November 2013 tu tadi bisi mansutka langgur penemu ke minta penuduk Sarawak dalam menua Malaysia patut diserenih baru lebih agi ba pekara bepelasarka sejarah.
Enti pekara nya enda diputar enggau lengkas, BN menua tu betapi enggau pemar maya Pengawa Bepilih Kunsil Nengeri ke disadang diatur dalam taun 2016 enggau Pengawa Bepilih Besai dalam taun 2018.
“Menua Sarawak sebuah ari 14 buah nengeri tauka ari 4 buah menua ke nyain Sempekat Malaysia. Enti ketuai perintah besai enda tesautka tanya nya, rayat di Sarawak deka semampai tinggal ba atur pemansang enggau ungkup belanja,” ku Masing.
Temenggung Datuk Kenneth Kanyan muji Masing ti bejaku ngarika semua rayat Sarawak. Kelimpah ari nya, bisi mega sekeda pekara ke ngemediska majak ngenelihka ati rayat Sarawak.
Ku iya, empai lama udah, peranak menua tu berasai enda lantang ati lebuh leka jaku ‘Allah’ nyadi sebengkah berita ke angat.
Pupu raban bansa di Sarawak ulih begulai enggau likun taja pan bebida ba batang pengarap.
Kenneth Kanyan mantaika pengaga ati iya lebuh Kepala Menteri Sarawak, Pehin Sri Abdul Taib Mahmud ngetanka raban Keristin sereta madahka sida nadai ditagang ngena leka jaku ‘Allah’. Ba kitai rayat Sarawak, pekara nya nadai nyadika penanggul.
“Udah lama kami begulai enggau macham raban bansa ke bebida batang pengarap, sebedau menua Malaysia ditumbuhka. Pemutus ngena leka jaku ‘Allah’ enda ulih dikena ngikat menua Sabah enggau Sarawak. Kami mega enda ulih ngubah status quo di Sarawak (diambi ari jaku Paul Sir kena 16 November),” ku iya.
Kenneth Kanyan mega ngenang baru sentang aum 51 iku ketuai Iban (Pengarah enggau Penghulu) ke diatur kena 15 Februari taun 1962 ti berandauka perambu numbuhka menua Malaysia ke mungkur perintah menua Sarawak. Aum 51 iku ketuai maya nya suba ngarika urung 112,000 Iban ari semua penyampau rayat ke deka manggai 238,000 iku. Mayuh pengari bansa Iban ke betemu enggau Cobbold Commissionba kandang menua bukai dalam Bagi Ketiga madahka sida nyukung Resolusyen Kapit nya.
Bala ketuai nyapai sempekat nyukung pekara nya ke alai sekeda ari langgur penemu tauka resolusyen sida nya udah dibantaika surat berita sereta disua ngagai commission lebuh ke nemuai ke Kapit kena 19 Mac taun 1962.
Antara isi resolusi, iya nya;
1. Ketuai menua Sarawak enda tau enda peranak asal menua Sarawak.
2. Ketuai ba genap buah nengeri dalam gerempung Malaysia dikemendar nyadi Ketuai ba Perintah Besai Malaysia.
Adat Lama tetap ari baruh pegai perintah nengeri
3. Tanah tetap ari baruh pegai perintah nengeri
4. Jaku English tetap nyadi batang jaku di nengeri Sarawak sereta mega deka nyadi batang jaku di Malaysia.
5. Nadai betagang megai batang pengarap.
6. Menua Sarawak patut bisi pengari ba perintah besai.
7. Pemesai British agi ditanka ditu, nganti nyentuk ke bisi peranak menua ulih nyilih
8. Peranak asal menua Sarawak ulih ngasaika sereta diungkupka status ke sebaka enggau bansa Melayu di Malaya.
9. Pelajar dikemerat sereta disebakaka diserata menua Malaysia enggau naka pengelengkas.
10. Peranak menua Sarawak enda dichiping diberi scholarship belajar ngagai menua tasik.
11. Immigresyen tetap ari baruh pegai perintah menua Sarawak.
12. Power reserved in the Constitution to a State may not be changed without the agreement of the State.
13. Menua Sarawak deka dikemansangka belama (Nitihka riput ari Enquiry, North Borneo and Sarawak, 1962 by Cobbold, chairman of the Commission of Enquiry, dated 21 June 1962).