RESU HARI KRISMAS: Vincent (duduk dua kanan) begulai enggau komiti pengatur ba aum media di Sibu, bedau lama ke udah.
SIBU: Gerempung Nembiak Keristin (YMCA) ditu deka ngatur program Karoling Krismas seraya bebaika dian kena 7 Disember tu ila ba Mua Pintu Penama Sibu, belabuh pukul 7 malam.
Chairman gerempung nya, Vincent Lau madahka program nya diatur kena nyendiaka diri nyambut penatai Hari Krismas.
“Kami arapka nengah program tu ulih mandangka pengelikun ba mensia mayuh di kandang menua tu,” pia ku iya ba aum media ditu kena Hari Lima tu tadi.
Ku iya, program ninting taun nya udah diatur kenyau ari taun 1975, tang diketu lalu diatur baru dalam taun 2011.
Ku iya, aktiviti Karoling seraya belagu puji Krismas besai amat reti ngagai orang ke megai pengarap Keristin tiap kali nyerumba pengerami nya.
“YMCA nadai natak sebengkah batang pengarap Keristin aja. Semua gerija Keristin sebaka magang enda milih nya Katolik, Anglikan, Methodist, Sidang Injil Borneo (SIB) enggau ke bukai.
“Kami meransang semua orang ke megai batang pengarap Keristin ditu masuk ba program tu.
“Kami deka mantaika mayuh bengkah main malam nya baka koir, belagu, tanda Krismas, beperindang enggau sekeda main bukai,” ku iya.
Sesapa ke datai ngulu program nya deka diberi perais Krismas ti disadung ‘Santa Claus’.
“Nembiak mit ke datai malam nya mega deka diberi ruti tusu enggau ‘Glow Stick’ dikena meri penerang malam nya,” ku iya seraya madahka program nya deka digulu bala ketuai gerija Bagi menua nya.