SIBU: Tuai raban bansa nyengkaum Tuai Rumah udah digerah ngambika mai peranak rumah panjai sida mindah ngagai palan ti likun enti sema penusah ampuh bah nyadi di Selangau.
Kaban Kunsil Nengeri (ADUN) Tamin Datuk Joseph Mauh Ikeh madah, kelimpah ari nya sebengkah komiti mega udah ditumbuh ti betuaika Pemesai Opis Pelilih Mit Selangau.
“Kitai naka alah nyikap diri napi penusah ampuh bah ke enda disadang tau nyadi di Selangau,” ku iya madah maya dikerandau pengarang berita, kemari (ensana).
Sebedau nya iya ditanya bisi ke enda pengawa bejejaga dikerundingka nyema penusah ampuh bah nyadi ba Selangau nyengkaum di Tamin.
Mauh nimbal, enti sema penusah nya nyadi, peranak dia deka dipindah ngagai SJK Tong Ah, Balai Gerempung Dayak Iban Sarawak (SADIA) enggau Gerija Saint Charles.
Bagi menua Balingian enggau Arip, ku Mauh, palan ke udah diperunding alai pindah iya nya SMK Ulu Balingian enggau SK Bukit Arip kelimpah Balai Mensia Mayuh Sekuau di Sekuau.
“Palan baka tu mega bisi ditumbuhka ba Stapang,” ku iya sambil madah naka ke diatu menua Selangau nadai kelai deka ampuh bah taja hari suah ujan.